G20 palaite vawiinah an rawn thleng dawn; B20-a ngaih pawimawh tur zingah mau/ rua, puantah, thiamhnáng a tel

Group of Twenty (G20) Business Meeting, Aizawla tel tur ram hrang hrang palaite chuan vawiin hian Aizawl an rawn thleng dawn a, naktukah Business Meeting neih a ni ang. Chief Minister chuan, G20 Business Meeting (B20) Aizawla nghah tura ngaih pawimawh tur zingah mau/rua, puantah leh thiamhnang deh chhuah lama thil siamte a tel thu a sawi.

Aizawla G20 Meeting nghah tur chung­changah hian CM Zoramthanga chuan nimin khan CMO conference hall-ah thuthar thehdarhtute a kâwm a; B20-ah hian mau/rua, puantah, thiamhnang deh chhuah lama thil siam (handicraft), thiamna tihhmasawn (skill development), sumdawnna lama bul ṭanna (start-up), nursing leh paramedics, urban planning leh infrastructure lamah insàwrbing a ni dawn tih a sawi a ni.

G20 meeting-a tel tur palaite chu vawiinah an rawn thleng dawn a, naktukah Mizoram University campus-ah B20 meeting neih a ni ang a, March 3, Zirtawpni-ah Chapchar Kût hmannaah an tel ang.

Chief Minister sawi danin, B20-ah hian ram 17 aṭangin sorkar palai (diplomat) 17 leh sumdawng palai 48 an rawn tel dawn a, chu'ngte chu - Argentina, Bangladesh, Bhutan, Canada, Costa Rica, Cote D’Ivoire (Ivory Coast), China, France, Germany, Ghana, Japan, Nepal, Russia, Sri Lanka, South Africa, United States leh Zimbabwe-te a ni.

Ram dang aṭanga palaite bakah, India ram chhunga sumdawng eng emaw zat an tel dawn a, Mizoram aṭangin sumdawnna lama inhmang mi 85 an tel ang. Sorkar laipuia Commerce & Industries minister of state Som Parkash leh External Affairs minister of state Dr RK Ranjan Singh bakah, sorkar official-te'n an hmanpui dawn a ni.

B20 meeting hi Centre for Indian Industries-in an buaipui dawn a, sumdawng leh sumdawng indawrna (business to business) leh sumdawng leh sorkar indawrna (business to government) anga kalpui a ni ang.

Mizoramin hun rei tak harsatna hrang hrang a tawh thu sawiin Zoramthanga chuan, "Chu'ng karah chuan Mizoramah investment lamah theihna a awm em, tihte sawiho a ni dawn. He hun hi sorkar chuan remchangah a hmang dawn a, sumdawnna lama bung thar kan kai ngei kan beisei a, kan ram mawina te, kan hnam nunphung, hnam lâm leh zaite lo hmuhtir kan tum a ni," a ti.

CM Zoramthanga chuan, mau chungchangah India sorkar an la kai harh zo lo tih sawiin, "Prospect ṭha a awm e, tih lo entir a, a um zuina nen kalpui kan tum," a ti a; Mizoram chu dâwm kàn ngai a nih avangin G20 meeting Mizorama nghah a nih theih nan theihtawp an chhuah thu a sawi.

Zawhna chhangin Zoramthanga chuan, "North east state dangin an neih loh remna kan nei a, remna export tur nei ṭha ber kan ni a, hengte hi kan lo hrilh tur a ni. Remna hi India-a inremna neih tawhah a hlawhtling ber lâwt lak a ni a, NE state leh ṭhenawm ramte êntu atan, symbol atan hman an duh niin kan hria," a ti.

Chief Miniser chuan, Aizawlah G20 meeting nghah a ni chu lawmawm an tih thu sawiin, "Min duhsakna avangin kan lawm em em. Sorkar laipui hnenah lawmthu kan sawi a, Prime Minister hnenah lawmthu kan sawi a, a buaipuitu zawng zawngte chungah lawmthu kan sawi a ni," a ti.

Zoramthanga chuan, Aizawla B20 session neih tur chu hmarchhak biala B20 neih tur pali zinga a pahnihna a nih thu sawiin, "India chuan December 1, 2022 khan G20 president nihna a chelh ṭan a, India-in president nihna a chelh chhunga thupui chu 'World as one family' tih a ni," a ti a; India-in G20 nihna a chang chu India tan thil pawimawh tak a nih thu a sawi.