DCMA minister Zira'n ngaihdam a dil

District Council and Minority Affairs (DCMA) minister R Lalzirliana chuan autonomous district council (ADC) chungchanga Assembly House-a a thusawi avangin nimin khan Assembly session-ah ngaihdam a dil.

DCMA Minister hian February 23, 2023 khan Assembly session-a a demand sawihonaah, "Lém kan va der mai mai a nih kha saw lamah khan, Congress-ah khan vote zawn nan kan va hmang mai mai a nih kha, an ni ho hian an lo awih ve em em a, kha chauh kha a ni, a ho tak tak a ni,” tiin a sawi a; ADC huam chhunga pawl hrang hrangin demin, ngaihdam dil turin an phût a ni.

Nimina session-ah R Lalzirliana chuan, "Ka ṭawngkam kha ka'n en nawn leh hian ka duh záwng a ni bik hauh lo a. Mimal pakhat rilru tihnat pawh hi hrehawm ka ti a, kan chhim lam unaute rilru kan lo tiná a ni tih vawiinah hian ka lo hria a. Chuvangin, Kristian kan ni a, Pathianni hi ka hun a ni leh nghal a, ngaihdam dil hi a inhmeh hlein ka hria a. Ka thusawiah an rilru a lo ná a nih chuan ngaihdam ka dil a ni," a ti.

R Lalzirliana chuan, DCMA department chu mi dangin enkawl se a duh thu sawiin, mi dang enkawltir turin a dil nghal.

Sorkar hmasa (Congress sorkar) chhungin ADC pathumte chu kum 10 chhung deuh thaw a enkawl tih sawiin Lalzirliana chuan, "A tàwp dawn lamah kha chuan kan CM zahawm tak, ka pu hnenah khan 'high court hawn mai, inkhin maite hi an awlsam si a, inhêkna a tam thei si a, chuvangin, kei hi chuan ka tlin lo a ni, min chhâwk mai teh' ka ti a. Min hrethiam takin min han chhâwk a, hun rei lo tê chu," a ti.

R Lalzirliana chuan, MNF sorkarah pawh DCMA depart-ment chu a kutah a awm leh a, a kum a tam ve tawh avang leh a hriselnate pawh a pan deuh tawh avangin chak ṭha zawkte enkawltir turin vawi duai lo CM hnenah a dil thu a sawi a, "A chak zawkte an duh angin pek theih a nih chuan ka lawm ngawt ang a, dilnate pawh ka'n thehlut nghal ni se la a ṭhain ka ring," a ti a; tun sorkar term-ah DCMA minister a ni chungin ADC lamah a la kal loh thu a
sawi bawk.