Tiger Reserve vengtute châwl dawn
Dampa Tiger Reserve venhim hna thawktu, Tiger Protection Force (TPF)-te chuan thla ruk hlawh an lâk tawh loh avangin vawiin aṭangin tiam chin awm loin hna thawh tawh rih loh an tum.
TPF hruaitute aṭanga thu dawn danin, TPF-te hian thla ruk chhung an thawh hlawh an la tawh lo a, kum 2021 tawp lam aṭang khan sorkarin hlawh a batsakte chu thla kimin an dawng tawh ngai lo a ni.
Vanglaini palai zawhna chhangin TPF hruaitute chuan, CSS hnuaia thawk an nih angin thla kipa hlawh an la thei lo chu an hriatthiam ṭhin thu an sawi a, "Kum dangah chuan thla eng emaw zat hlawh kan lak loh pawhin a hlâwmin a hnuah min pe ṭhin. Kum 2021 tàwp lam aṭang khan thla sarih hlawh kan lak lohah thla thum hlawhte min pe chauh a, tun thlengin hlawh kan lak loh hi a kimin min pe tawh ngai lo," an ti.
TPF hian Principal Conservator of Forest (PCCF) leh Dampa Tiger Reserve Field Director hnenah February 6, 2023 khan an harsatna tawhte ziakin an thlen a; an beisei ang chhànna an hmuh loh avangin March 1, 2023 aṭangin duty tawh rih loh an tum a ni.