Nikumah TB vangin mi 74 an thi

Nimin khan Health Services conference hall-ah National TB Elimination Programme (NTEP) Review Meeting neih a ni a; kum 2022 chhungin Mizoramah tuberculosis (TB) vangin mi 74 an thi tih tarlan a ni.

Review meeting-a tarlan danin, kum 2022 chhung khan ngawr (TB) vei rinhlelh mi 17,315 endik an ni a, chu'ng zinga mi 2,082 chu TB vei an ni tih hmuh chhuah a ni. MDR-TB vei 113 hmuh chhuah a ni a, TB vei zinga HIV vei tel mi 331 (15.38%) hmuh chhuah a ni bawk. Nikum chhung khan TB vangin mi 74 an thi a ni.

October-December, 2022 chhung bikah TB vei rinhlelh mi 2,827 endik zinga mi 470-in TB an vei tih hmuh chhuah a ni a; MDR-TB vei mi 26 hmuh a ni bawk.

Ṭhutkhawm hi state TB officer Dr Vanlalfela'n a kaihruai a, district tina TB officer leh thawktu dangte an tel. District hrang hrang TB index performance-ah Kolasib chu ti ṭha berah thlan a ni.

Meeting-a tarlan danin, TB vei damlote chaw ṭha hmanga ṭanpuina scheme, Community Support-ah ṭanpuitu donor mi 53 hmuh a ni tawh. Community Support hi sorkar laipui scheme a ni a, TB damlote chu thla 6 aṭanga kum 3 thleng chaw ṭha hmanga ṭanpui theih a ni. NTEB chuan, Mizorama TB vei ṭanpui ngai mi 3,000 dáwn an awm laiin, donor hmuh tawh zat 53 chu a la tlem hle tih tarlangin, TB damlo ṭanpui tura pên chhuak turin mipui an sáwm a ni.