RRRa a nihna aṭanga bân turin ZPM party-in Governor an ngen

ZPM party chuan minister of state Robert Romawia Royte chu Representation of the People Act, 1951 (RP Act) Section 9(A) a bawhchhia nia an hriat avangin, minister/ MLA aṭanga bân turin Governor an ngen a, nimin khan ngen­na lehkha an thehlut.

Minister of state Robert Romawia Royte bàn tura ngenna lehkhaah hian ZPM general secretary SL Ngursailova Sailo-in hming a ziak a, larsap Dr Hari Babu Kambhampati-a'n a lo dawngsawng a ni.

SL Ngursailova Sailo chuan, "Pu Robert Romawia Royte hian RP Act, 1951 bawhchhiain dik lo takin a thuneihna hmanga hlâwkna a têl avangin (office of profit) ZPM chuan Constitution of India Article 192(1) thuneihna hmanga disqualify turin Governor kan ngen a ni," a ti.

ZPM tarlan danin, Robert Romawia hi North­east Consultancy Services (NECS) neitu a ni a, vawiin thlengin chhiah pawh GST hnuaiah return a la file a ni. NECS chu duhsakna uchuak tak hmangin Mizoram sorkara DCMA department nen single source selection hmangin Deed of Agree­ment an ziak. NECS chu proprietorship, mimal sumdawnna a nih angin, a neitu leh hlâwkna teltu chu Robert Romawia a ni tih a chiang hleah an ngai a ni.

Assembly House chhungah Robert Romawia'n NECS chu a fapa ta anga a sawi chungchangah ZPM chuan, "Election affidavit-ah a fapa hi a hnena innghat (dependent) a ni tih a tarlang. Electoral roll thar berah pawh chhungkaw khat, in khata chêng an ni tih a lang. Mizo Customary Law hnuaiah a fapa hi indang a la nih loh avangin a fapa ta anga a sawi pawh hi a nihna takah chuan thuneitu leh enkawltu chu Minister of State hi a ni tih a chiang hle," an ti.

ZPM chuan, "Heng zawng zawng en hian, Minister of State hian a thutiam bawhchhiain a thuneihna hmangin sorkar aṭangin hlâwkna a têl ngei a ni tih a tarlang," an ti a; chuvang chuan ZPM party chuan India danpui hnuaiah minister of state a nihna aṭanga bàn turin Governor an ngen a ni.