MPCC-in Manifesto No. 2 an tlangzarh; Misual tlemtêin min rap bet - Lalsawta

Kumin kum tawpa Assembly inthlanpui awm tura Mizoram Pradesh Congress Committee (MPCC) Manifesto No. 2 chu nimin khan Congress Bhavan-ah MPCC president Lalsawta'n a tlangzarh a; thu sawiin, Mizoramah misual tlemtê intêl khawmin mi ṭha ngawi rengte an rahbeh thu a sawi.

MPCC President chuan, misual tlemtê rahbeha awm reng chu an phal lo tih sawiin, "Kan tu leh fate'n ram chhe lutuk an rochun kan phal thei lo. Misual, mi pamham, suma inlei tlin tumte lakah hian kan tlâwm mai dawn em ni? A teuh lo mai," a ti.

Sorkar ṭhaah chuan thil sual tih a har thu sawiin Lalsawta chuan, "Sorkar ṭha loah chuan thil ṭha tih a har thung. Sorkar ṭha loah chuan hausak a zahthlak a, sorkar ṭhaah chuan hausak loh a zahthlak," a ti a; sorkar ṭhain a tum ber chu - mi harsate hausaktir a nih ṭhin thu a sawi.

Sorkar hnathawkte tih lawmna zawngah miin an puh tih sawiin MPCC President chuan, "Old pension scheme hi kum 2045 thleng pek a ngai. Hei leh chen kan tlin tawh a, kan tlin zel ang. Hnathawh inang reng, an pension hnua an dinhmun a inthlau ta lutuk hi a ṭha lo," a ti.

Congress President chuan, sorkara thawktu tak takte chu sorkar hnathawk an nih thu sawiin, "Eng ang pawhin sorkar siam ila, a thawktu tak tak chu an ni," a ti a; Congress party chuan sorkar hnathawkte dinhmun a pawimawh em avangin dah pawimawh ṭul an tih thu a sawi.

MPCC Manifesto-2 hi hlâwm paruk - corruption awm lohna sorkar, dan rorelna, langtlang sorkar, thuneihna sem zâi, smart government leh sorkar viak ṭha leh mipui rin ngam tihahte ṭhen a ni.