Union MoS leh SWTA Minister inkâwm

Union Tribal Affairs minister of state Renuka Singh Saruta leh Mizoram Social Welfare & Tribal Affairs minister Lalrinawma chu nimin khan Lengpui Airport-ah an inkâwm.

Lalrinawma chuan, Mizorama vocational training centre (VTC) panga kalpui mek chu mipuiin an chhawr ṭangkai tih sawiin, "VTC-te hi tun hnaiah a kalpuina tur sum a chatlak a, ṭha taka kalpui zel a nih theih nan Ministry of Tribal Affairs aṭangin sum a lo kal chhunzawm zel kan mamawh," a ti.

Kelsiha sak mek Ropuiliani Freedom Fighter's Museum sak pumna atana sum mamawh zat Tribal Affiars Ministry-ah thlen a nih tawh thu sawiin Lalrinawma chuan, sum an dil belh chu pek thuai a nih theih nan hma la turin Renuka Singh Saruta a ngen.

Union Tribal Affairs Minister hian nimin chawhma lamah Lunglei khawpuia sorkar hmunhma ṭhenkhat - Vocational Training Centre, Civil Hospital leh Eklavya Model Residential School, Pukpuite a tlawh a; hmalakna kal mek te, ruhrel leh kháwl an mamawhte leh thawktu chungchanga mamawhte a sawipui a ni.