Pre-paid smart meter hman theih beisei

Kawlphetha hman man pêk lâwk theihna, pre-paid smart metering chu kumin chhungin Mizoram pumah hman theih beisei a nih thu Power & Electricity minister R Lalzirliana chuan a sawi a; Aizawl khawlaia electric hrui hnawkte chu thlâk tum a nih thu a sawi bawk.

MNF member Dr ZR Thiamsanga zawhna chhangin R Lalzirliana chuan, "Smart metering, Zarkawt feeder (pilot project) bik hi March thla chhung hian consumer ṭhenkhatah enchhin tum a ni a, fel lo laite tihfel a nih hunah hman chhunzawm theih beisei a ni," a ti.

Aizawl khawlaia electric hrui hnawkte thlâk tum a nih thu sawiin PE Minister chuan, "Revamped Distribution Sector scheme hnuaia infrastructure work (loss reduction)-ah Aizawl khaw chhunga electric LT Line (bare conductor) hrui hnawkte ABC hmanga thlâk vek tum a ni," a ti bawk.