NHM-a thawkte Jan. 2023 thleng hlawh peNHM-a thawkte Jan. 2023 thleng hlawh pe

Health minister Dr R Lalthangliana chuan ZPM member C Lalsawivunga zawhna chhangin, National Health Mission (NHM) hnuaia thawkte hlawh January 2023 thleng pek tawh a nih thu nimin khan Assembly House a hrilh.

Dr R Lalthangliana chuan, kar kal ta khan NHM hnuaia thawkte hlawh chu January thla thleng pek a nih thu a sawi a, "February thla hlawh pawh tunah hian buatsaih leh mek a ni a, kan pe leh thei thuai turah ka beisei. Chutihrual chuan, hlawh la lo dang ang chi, kan health worker SEDP-te pawh kha nimin lamah kha chuan an account-ah a lut fai vekin ka hria," a ti.

C Lalsawivunga'n NHM hnuaia thawkte dah ngheh (reguralise) chungchang a zawhna chhangin Health Minister chuan, "An tam tham khawp mai a, NHM hnuaia thawkte hi 2,000 zet an ni a, category hrang hrang - doctor te, nurse te, health worker te, 4th grade nen lam an ni. Sum harsatna avangin tih zung zung a har khawp mai," a ti a; kum 2022-ah pawh sorkarin ngaihtuahna a séng nasa niin a sawi.