Scho' pek chungchang CM-in sawifiah

Finance enkawltu chief minister Zoramthanga chuan, zirlaite scholarship atan Finance department-in Planning & Programme Implementation department rawtna ang zelin harsatna awm loin SEDP counterpart funding aṭangin state matching share (SMS) tur pek chhuah ṭhin a nih thu a sawi.

Nimina Assembly session-ah Zoramthanga chuan ZPM member Lalchhuanthanga zawhna chhángin, Mizoram sorkarin zirlaite scholarship atan budget estimate-ah state matching share tur bik a hranpain a dah ngai lo tih a sawi a, "Ama'rawhchu, scholarship tur atan fund dawn a nih veleh Planning & Programme Implementation department recommendation ang zelin state matching share hi Finance department chuan harsatna awm loin a pe chhuak ṭhin," a ti.

Chief Minister hian a hun taka scholarship sem theih loh chhante a tarlang a; a hun takah central release dawn a nih loh vang te, budget allocation siam te, expenditure sanction lak chhungte'n hun eng emaw chen a awh ṭhin vang te, technical thil fel lo a awm palhin sum pek chhuah a tihkhawtlai cháng a awm vangte a ni.