Rs 3,00,000 pek hman ngaihna a awm lo - CM Zoramthanga

Finance enkawltu chief minister Zoramthanga chuan, August 2, 2022-a SEDP Board ṭhutkhawm a nih hmain department hrang hranga SEDP Pilot Project hnuaiah mi 7,801 hnenah ṭanpuina pek a nih thu leh, SEDP ṭanpuina Rs 3,00,000 pek hman ngaihna a awm loh thu House a hrilh.

Nimina Assembly session-ah ZPM member Dr Vanlalthlana zawhna chhángin Chief Minister chuan, department hrang hranga SEDP Pilot Project hnuaiah ṭanpuina pek mi 7,801 an awm thu a tarlang a; chu'ngte chu - Agriculture department hnuaiah mi 5,563, AH&Vety department-ah 1,022, Commerce & Industrices-ah 438, Horticulture-ah 413, LRSWC department-ah 360, Sericulture-ah pali leh Science & Technology hnuaiah mi pakhat an ni.

INC member C Ngunlianchunga'n SEDP pilot project hnuaia ṭanpuina dawngtute hnena Rs 3,00,000 pek tawh a nih leh nih loh a zawh belhna chhángin Zoramthanga chuan, "Kan pe hman lo ang, a chhan chu Covid khan a dawtah khan min nang chho a, hei a dawt kan ṭan leh dek dek chauh a ni a, pekna hman a awm ngang lo a ni e," a ti.