CM-in case a neih leh neih loha inhnialna, "Inhnialna vak turah ka ngai lo" - Lokayukta Chairman

Mizoram Lokayukta chairman C Lalsawta chuan, Mizoram Chief Minister laka Mizoram Lokayukta-a camplaint chu Lokayukta case-ah ziah luh a nih avangin inhnialna vak tura a ngaih loh thu a sawi a; thubuai nei anga miin an ngaih chin a inan loh theih thu a sawi bawk.

Lokayukta hian April 11, 2022 khan PWD hnuaia contract hna inpek chungchangah chief minister Zoramthanga lakah complaint an dawng a, thubuai ziak lutin, case no. chu MLC no. 44/2022 a ni. Hemi chungchangah hian Lokayukta chuan May 6, 2022 khan PWD Engineer-in-Chief hnenah lehkha a thawn bakah, chhànna a dawng.

Lokayukta chuan chhui zui turin, preliminary enquiry tih turin thutlukna a siam zui a, preliminary enquiry kalpui turin Anti Corruption Bureau (ACB) hnenah June 27, 2022 khan a hriattir a, ACB-in an chhui mek. Tuna a dinhmun (status) Lokayukta-in a tarlan dan chu 'Enquiry pending with ACB' tih a ni.

Chief Minister lakah vêk hian Mizoram Lokayukta hian thubuai, MLC case no. 42/2022 a ziak lut a, chu chu 'Mismanagement in the renovation works of Lengpui Airport' tih a ni.

Hemi chungchangah hian Lokayukta chuan March 14, 2022-ah complaint a dawng a, March 16, 2022-ah GAD Secretary hnenah hriattirna lehkha a thawn a, October 10, 2022-ah preliminary enquiry ti turin a hriattir zui a ni.

Mizoram Lokayukta case no. 42/2022 leh 44/2022-te hi inkaihhnawih a nih avangin kaih kawp (amalgamate) a ni thung. 'List of Corruption Cases in Mizoram Lokayukta' tiha a lan danin, a pahnih hian ACB-in preliminary enquiry an tih lai mek ve ve a ni a; chutiang chiah chu case dang pakua a awm bawk.

CM Zoramthanga'n case a neih leh neih loh chungchangah hian ZPM member Lalduhoma leh MNF member Lalrintluanga Sailo te chu February 24, 2023 khan Assembly session-ah an inhnial a; Lalrintluanga chuan, CM-in case a neih chuan ngaihdam dil mai ni loin, a bân ngam tur thu a sawi a ni.

Mizoram Lokayukta-in 'case' a ziah luh tawhte chungchangah hian chairman C Lalsawta chuan Vanglaini palai zawhna chhángin, Lokayukta-in case a ziak lut a, Lokayukta-in ti tura a tih angin ACB-in preliminary enquiry an tih mek thu a sawi.

C Lalsawta chuan, preliminary enquiry titu ACB pawhin an register tawh thu sawiin, "Case nei leh nei lo tihah inhnialna vak turah ka ngai lo. Mahse, miin a hnial tlat chuan a hnial a ni mai a," a ti.

Lokayukta Chairman sawi danin, Chief Minister laka complaint thehluhte chu ACB-in an chhui mek a, ACB-in report Lokayukta-a an thehluh hunah chhui zui zel tlâka a ngaih chuan chhui zui a ni ang a, chhui zui tlâka a ngaih loh chuan tihtawp a ni ang.

Lokayukta-ah Chief Minister-in case a neih leh neih loh chungchangah opposition group leader Lalduhoma chuan, "Kan CM hian case lo nei ta se, Dampa bial MLA zahawm tak hi he laiah hian thu dik lo a sawi avangin thuphá a chawi ve ngam ang em?" tiin a zawt a; Dampa bialtu MLA Lalrintluanga Sailo chuan, "Case a lo nei a nih chuan ngaihdam dil mai ni loin ka báng ngam ang," a ti.

Lalduhoma chuan, Lokayukta-a CM case no. chu MLC no. 42/2022 a nih thu a sawi a; Lalrintluanga chuan, "Case petu tur hi Lokayukta a ni dawn em ni? Police-in a case an chhui hnuah an pe dawn a ni lo'm ni?" a ti. Lalduhoma chuan, "Inquiry kal mek a ni a, investigation a kal mek a, chu bâka thubuai nei eng nge awm chuang?" a ti thung.

CM-in thubuai a neih chungchang chu Lokayukta website-a 'List of Corruption Cases in Mizoram Lokayukta' tiha mi a nih thu sawiin Lalduhoma chuan, "Case awm loin inquiry a awm thei lo a, chhui tur a awm lohin chhui theih a ni lo. Case a awm phawt ang a, inquiry a awm tur a ni. Official tak pawhin case tih an hman avangin kan CM hian case a awrh a ni, an chhui mek a ni, tih loh theih a niin ka hre lo," a ti a; Dampa MLA chu a bân dawn leh dawn loh leh, ngaihdam a dil dawn leh dawn loh chu a sawi phâk a nih loh thu a sawi bawk.

Inhnial laia session kaihruaitu deputy speaker H Biakzaua chuan, case chungchang chu subjudice a nih chuan House-ah sawiho theih a nih loh thu a sawi a, "Case a neih thu hi official-in khawiah mah hriatna a awmin ka hre lo," a ti.

Deputy Speaker chuan, enquiry kal lai chu case a tling lo nia sawiin, "Enquiry a kal ang a, case puitlinga an la dawn a nih chuan case an register thei ang a. Tunah chuan case a neih dawn leh dawn loh enquiry an la mek chauh a ni," a ti a, Home Minister sawifiah atan a dah.

Home minister Lalchamliana chuan, thu inchuh chu police a zawh chian thu sawiin, "Case chu nei se police hoin case an register tur ni âwm tak a ni," a ti a; complaint chu FIR ang a nih thu sawiin, "FIR hi keini police ngaihdan chuan case a la tling lo. Lokayukta khan ACB-ah preliminary enquiry ti turin thupek a chhuah a, keini police ngaihdan chuan case a la tling lo," a ti.