Bike 100 police hnenah pe

Hero MotoCorp chuan an corporate social responsibility scheme 'Hero We Care' aṭangin Mizoram Police hnenah bike 100 an pe a, nimin khan 1st MAP parade ground-ah IGP (Headquarters) John Neihlaia hnenah Hero MotoCorp-in an hlan.

Sorkar thuchhuah tarlan danin, police-in bike 100 an dawn chu cheng nuai 79 man a ni a, hmeichhia leh naupangte an harsatnaa puihnaa hman tur a ni. Home Minister chuan Mizoram police unit tin hnena an mamawh dan ang zela sem rual tura ruahmansa anga pek turin a vailiam nghal.

Bike inhlanna inkhawm hmanpuitu Home minister Lalchamliana chuan, Mizoram police-in lirthei 730 vel a neih zinga 30% vel chu hman hleih-theih a nih tawh loh thu a sawi a, "Mizoram police hi lirthei leh housing quarters lamah kan pachhe em em a, mawhphurhna ka lâk tirh aṭangin theihtawp kan chhuah. Project-te kan han siam a, kan beisei ang hi kan la nei thei rih lo," a ti a; police station hrang hrangte mamawh an pe mai thei lo chu hrehawm a tih thu a sawi.

Lalchamliana chuan, Hero Motocorp-te'n phal taka police-te hman tur bike 100 an pe chu lawmawm a tih thu sawiin, "Sorkarin sum harsatna avangin thil tam tak a ti thei lo a, mi dang puihna avangtein thil tam tak a dawng ṭhin. DGP Pu Devesh Chandra Srivatsva kaihhruaina hnuaia hetianga kan mamawh tak mai kan nei ta hi lawmawm ka ti a, police hotute chungah lawmthu ka sawi. Bike 100 hian kan chetvelnaah awlsamna nasa tak min thlen ka beisei," a ti.

Bike inhlannaah hian Hero Motocorp East Zone zonal head B Swaminathan leh DGP Devesh Chandra Srivastva te pawhin thu an sawi.