2023-24 Mizoram budget pawm a ni

Mizoram Legislative Assembly budget session tawp ní, February 28, 2023 (Thawhlehni) khan kum 2023-24 chhunga Mizoram budget cheng nuai 14,34,194.64 (vbc. 14,341.95) aṭanga Assembly House-in a pawmpui (pass) ngai cheng nuai 12,11,296.63 (vbc. 12,112.97) chu pawm a ni.

Mizoram budget cheng nuai 14,34,194.64 zinga nuai 2,22,898.01 chu Assembly House-a pawm kher ngai lo chi, 'charged' a ni a, chu'ngte chu House-ah pawm kher ngai loa hman theih a ni. Cheng nuai 12,11,296.63 erawh chu House-a pawm ngai (voted) a ni thung.

Kum 2023-24 chhunga Mizoram budget pumpui cheng nuai 14,34,194.64 zinga nuai 2,58,086.34 chu centrally sponsored scheme aṭanga hmuh beisei a ni.

Sorkar department hrang hranga sum ṭhen danah, Finance department-ah dah tam berin, cheng nuai 3,32,474.79 dah a ni a, a dawttu School Edu-cation department-ah nuai 1,56,331.66 dah a ni. Sum dah tlemna ber Parliamentary Affairs-ah nuai 101.86 dah a ni thung.