Governor leh Union MoS-te inkâwm

Governor Dr Hari Babu Kambhampati leh sorkar laipuia Steel leh Rural Development enkawltu Union minister of state Faggan Singh Kulaste chu February 28, Thawhlehni zan khan Raj Bhavan-ah an inkawm a; nimin khan Commerce & Industries minister of state Som Parkash nen an inkâwm bawk.

Larsap leh Faggan Singh Kulaste inkawmnaah hian Mamit district-a sorkar laipui leh state sorkar hmalakna te, hmasawnna ruhrel din chungchang te, mipui mimir khawsak phung chawikan, kawngpui leh inbiakpawhna tihchangtlun dan turte an sawi dun. Faggan Singh hian nimin khan Mizoram chhuansanin New Delhi a pan a ni.

Commerce & Industries minister Som Parkash hi G-20 Business Summit-a tel tura rawn zin a ni a; Larsap chuan, Mizorama Commerce & Industries sector dinhmun tlangpui a lo hrilh a; Mizoramah kawngpui ṭha a awm a, thuk zawka rél kawng a luh chuan hmalakna tam zawk a awm theih a rin thu a sawi.