Cheng nuai 268 eirûk thubuai nei, a tlânbona New Delhi-ah man a ni

MAMCO sum cheng nuai 268 tichingpena puh vanga Anti Corruption Bureau (ACB)-in thubuai an siamsak Musta Gur Rahman, Guwahati chu February 24, 2023 khan New Delhi-ah man a ni a, vawiinah Aizawl rawn thlenpui beisei a ni.

ACB SP Lalsanglura hnen aṭanga Vanglaini thu dawn danin, MAMCO sum cheng nuai 268 eirûknaah ACB chuan December 3, 2015 khan thubuai an ziak lut a; an chhuinaah khatih laia MAMCO deputy manager Lalremthanga leh a consultant Musta Gur Rahman chu inhnamhnawihah puh an ni.

ACB chuan Lalremthanga leh Musta Gur Rahman te chu an man a, interim bail hmangin Court-in a chhuah a ni. A hnuah Guwahati High Court, Aizawl Bench chuan Musta Gur Rahman bail dilna a hnâwl a, court hniam zawka kal turin order a siam a; mahse, Gur Rahman chu court hniam zawkah inlan loin a tlanbo zui a ni.

Lalremthanga chu Special Judge (Prevention of Corruption Act) chuan November 22, 2022 khan thiam loh a chantir a, kum 5 chhung táng tur leh Rs 5,00,000 chawi turin a hrem. Gur Rahman man phalna (warrant of arrest) pawh court chuan a tichhuak nghal bawk.

ACB chuan warrant of arrest bawhzuiin Musta Gur Rahman chu an zawng reng a, Mizorama IPS officer lo thawkte puihnain February 24, 2023 khan man a ni. Gur Rahman la turin ACB officer pahnih chu New Delhi-ah an la chám mek a, vawiin hian Aizawl rawn thlenpui a, Special Court hmaah hruai tum a ni.

Special Court (Prevention of Corruption) Act chuan kum 2022 chhung khan ACB case parukah mi 21 thiam loh a chantir a ni.