Laldenga kha freedom fighter kan ti a, Mizo Hnam Pa-ah kan puang - Tawnluia

MNF party chuan nimin khan Mizo Hnam Rûnah kum 1966-a Mizoram independence an puan champha, Mizo National Day an hmang a, martarte sûnna hun an hmang. Thusawitu MNF senior vice president Tawnluia chuan, MNF dintu Laldenga chu Mizo Hnam Pa-ah an puan thu a sawi.

Deputy chief minister ni bawk Tawnluia chuan, Mizoram mipuite Mizo National Day chibai a bûk a, Laldenga chu zahna chibai bûk nachang an hriat zel a ngaih thu sawiin, "Mizo hnam champion tura a kaihhruaina kha a nêp lo... Mizo hnam tan zalenna a sual a, ram tan a bei ngam. Mi ṭhenkhatte'n kalsual leh India hmelma angin sawi mah se, keini chuan Pu Laldenga kha freedom fighter kan ti a, Mizo Hnam Pa-ah kan puang a ni," a ti.

Tawnluia chuan, hnam tana martarte chu Mizo hnam kal zelna tura nun hlânte an nih thu sawiin, "Kan hnam martarte rual zelin kan kal dawn," a ti. 'Pathian leh kan ram tan' tiin an theih ang tâwk thawk turin an rammut thu sawiin, "Mahni tana rammu kan ni lo a, ram leh hnam tana thawk kan ni. Thisena hming ziak, Mizo nationalism chawi nung tur leh kan ram him nana chhuak kan ni," a ti a, mahni ropuina tura thil ti an nih loh thu a sawi.

Mizo National Day awm chhan sawiin Tawnluia chuan, MNF hruaitu hmasa mi 61-te'n March 1, 1966-ah independence an puang tih a sawi a, "Mizo hnam pumin min thláwp a ni. Chaw ngheiin, lu chhum bán chhum huamin an lo bei tawh. Khawvel hriatah zalenna kan sual a, political solution erawh Zoram mipui duh danin India nen inremna neiin kan lo awm ta a ni," a ti.

MNF Senior Vice President chuan, MNF chu Mizo hnam tana din leh ding a nihna chu a ropuina a nih thu sawiin, "Mizo hnam hmahruaitu leh hnarkaitu kan ni. Zalenna neia rorelna pakhat hnuaia awm leh Kristian kan nihna vawnhimte hi a din chhan a ni," a ti a; Zo hnahthlak hrang hrangte rorelna pakhat hnuaia awm chu an duh ber leh MNF nationalism laimu pakhat a la nih reng thu a sawi.

MNF vice president Vanlalzawma pawhin thu sawiin, ram leh hnam tana pên chhuakte chu hre reng turin a chah a, "Eng vangin nge independence an puan, he ram leh hnam dam nan a ni," a ti.