KHAWTHLIR

Samagra budget
Chief secretary Dr Renu Sharma kaihhruaiin nimin khan CS conference hall-ah Samagra Shiksha, Mizoram State Executive Committee an ṭhukhawm. Kum 2023-24 atana Samagra Shiksha, Mizoram kalpuina tura sum ruahman central sorkara thehlut tur Annual Woks Plan & Budget 2023-24 leh, hnathawh dan leh sum endikna Annual Audited Statement of Accounts 2021-22 thlirho a nih hnuah an pawm a ni.

ZORO-in an dem
Zo Reunification Organisation chuan thuchhuah siamin, Manipur sorkarin Zo fate chenna hmun hrang hrangte anmahni remtih thlap ni loa reserved forest-a a puang te, chumi vanga in leh lo tichhia a, a hnawtchhuak ṭan chu an dem tak zet thu an tarlang. ZORO chuan, "Manipur sorkar thil tih hi hnam lian zawkin hnam tê leh tlem zawkte a páwngnêkna leh palzûtna a ni a, theihtawp chhuaha dodalin hma kan la dawn," an ti.

Hmanrua pe
India Formosa Foundation bultumin Chief Wildlife Warden conference hall-ah February 28, Thawhlehni khan Champhai district-a YMA branch 21 leh Champhai Sub-Hqrs leh, Champhai Vengthara Urban PHC hnenah oxygen concentrator hlan a ni a, Champhai District Hospital tan mobile ventilator hlan a ni bawk. He hun hi minister of state TJ Lalnuntluanga, Champhai South bialtuin a hmanpui a ni.

Panchayat Bhavan
Local Administration department minister K Lalrinliana chuan nimin khan Hualngohmunah Panchayat Bhavan sak thar a hawng. Minister chuan, Panchayat Bhavan chu village council-te'n dik taka khua leh tuite tana ro an rêlna hmun ni tura a duh thu a sawi. Panchayat Bhavan hi RGSA scheme aṭanga hmuh cheng nuai 10 leh Rural Development department material component Rs 4,00,000 hmanga sak a ni.

MLA-in hmanpui
Taitesena Group YMA chuan nimin khan West Bunghmunah inkhawmpui an hmang a, bialtu MLA Lalrindika Ralte-in a hmanpui. MLA chuan, "Ram leh hnam humhalh kan tih hian chhungkua, nupui pasal, fanaute leh kan khawtlang tana rinawm a keng tel," a ti. Taitesena Group YMA-ah hian branch 15 an awm a ni.