Rorelna thianghlim, corruption tihbuai loh sorkar siam kan tum - Congress President

Mizoram Pradesh Congress Committee (MPCC) president Lalsawta chuan, sorkar ṭha chu ram dinchhuahna bul a nih avangin, Congress party-in ram rorelna thianghlim, corruption-in a tihbuai loh sorkar siam an tum thu a sawi.

Lalsawta hian nimin khan Congress Bhavan-ah thla kipa chhuak tur Congress party chanchinbu, 'Ram Kalsiam' tih a tlangzarh a; thu sawiin, "Sorkar ṭha hi ram dinchhuahna bul a ni a, Congress party chuan ram rorelna thianghlim, corruption-in a tihbuai loh, ram mipui himna leh an mamawh tinreng ngaihtuahsaktu sorkar siam kan tum. Corruption awm lohna sorkar leh ram din hi kan tum a ni," a ti.

Mizoram chu mi taima leh thawk rimte dinchhuahna ramah siam an tum thu sawiin Lalsawta chuan, "Chumi atana pawimawh em em sorkar viak ṭha, mipui thlamuantu leh an eizawnna kawng tinrénga remchanna siamsaktu, sorkar ṭha hi din kan tum," a ti a, chu chu an manifesto-ah pawh an hman thu a sawi.

Lalsawta chuan, Congress party chanchinbu Ram Kalsiam chu party dang sawichhiatna ni loin, Mizoram mipuite ram hmasawnna kawng dik kawhhmuhtu, ṭhatna kawnga mi dang zirtirtu ni se a duh thu a sawi a; chanchinbute'n hmasawnna nasa takin an thlen ṭhin tih sawiin, tun thlenga chanchinbu leh TV channel ṭha tak tak a awm zel chu Mizoram mipui vanneihna a nih thu a sawi bawk.

Ram Kalsiam tih chanchinbu hi phek 16-a chhahin an tichhuak ṭhin dawn a ni.