Sorkarin ADC-te a ngaihthah - C Ngunlianchunga

Lawngtlai West bialtu MLA C Ngunlianchunga chuan, Mizoram sorkarin autonomous district council (ADC)-te a ngaihthah hle niin a sawi.

C Ngunlianchunga hian Assembly session February 28, 2023 zawh a nih hnuah nimin khan Lawngtlai a thleng a, Lai District Congress Committee pisaa inkhawm buatsaihah thu sawiin, "Mizoram sorkarin ADC-te a ngaihthah hle. Budget-ah ADC-te tan salary leh non salary indaih lo tur sain kum 2021 aṭang khan tihpun awm hauh loa dah ṭhin a ni hian ADC-te hmakhua an thlirpui lohzia a lang chiang a ni," a ti.

State sorkar chu ADC-te'n dinhmun sang zawk an chuankaina kawng dâltuah puhin, "Assembly budget session-ah District Council & Minority Affairs Minister-in ADC-te tan pài daih harsa thu a sawi chu mipui rilru a nat êm avangin ngaihdam dil thei lo dinhmunah a ding," a ti a; mipuite'n minister ngaidam se, an rilru chhungril tak a rawn sawi chhuahna a ni tih erawh hriat ni thung se a duh thu a sawi.