Mizoram Law College sak mek ṭhiaha a bul aṭanga sak ṭhat phût

ZPM Ṭhalai chuan thuchhuah siamin, Mizoram Law College building sak mek chu an sak chhiat êm avangin ṭhiah vek a, a bul aṭanga sak ṭhat leh ni se an duh thu an tarlang.

Mizoram Law College sak mek hi ZPM Ṭhalai hruaitute'n February 28, Thawhlehni khan an tlawh a, "Building sak mek hi a hna a chhiain a ban leh a beam inzawmna a khi chat vek a, an hmanraw hman a chhe hle. Sak zawm zel tlakah kan ngai lo a, zirlaite himna atan college building sak mek hi ṭhiah vek a, a bul aṭanga sak ṭhat a nih leh theih nan hma la turin Mizoram sorkar na takin kan phût a ni," an ti.

ZPM ṭhalaite chuan, "Mizoram Law College building sak mek hi sak zawh hun tiam aṭanga kum khat a ral hnuah 40% chauh thawh a ni a, a sakna tur sum RUSA aṭanga ruahman Rs 1,70,00,000 aṭangin Rs 1,17,96,000 lai release a ni leh, a sak hun chhung March 2023 thlenga pawhsei a nih leh chungchangah sorkar leh a satute inkarah hnung thak inhiah tawnna a awm em ni?" an ti a; sawifiah turin sorkar an phût.

MNF sorkarin contract hna chhe lutuk hlir mipui an hlui chu mipui zahlohna leh thamlohna lian taka an ngaih thu sawiin ZPM Ṭhalai chuan, "Zirna-in leh zel pawh hetianga suasam a ni hi pawi kan ti a, MNF sorkar hnuaia chhe lutuka zirna-in sak hi zirlaite zahlohna leh zirna ngaihthahnaah kan ngai a ni," an ti.