Budget session-ah MNF party an láwm

MNF party chuan thuchhuah siamin, Assembly budget session tluang taka zawh a ni chu lawmawm an tih thu te, MNF MLA-te chêt dan chu lungawithlâk an tih thu leh kum 2023-24 budget pawm a nite chu lawmawm an tih thute an tarlang.

Assembly session zawh takah zawhna 1,529 a lut a, sorkar bill pasarih pawm a ni tih sawiin MNF chuan, "Bill pass-puitu eptu MLA-te chungah MNF chuan lawmthu a sawi," an ti a; House leader Zoramthanga, minister-te leh MNF MLA-te chêt danah eptu lam leh mipuiin sawiselna tur an hre lo nia sawiin, "An thiamna, thawhrimna leh finnate Zoram mipuiin chhawr ṭangkaiin hma lam kan pan zelna tur rahbi tharah kan ngai," an ti.

MNF chuan, "Thiam tak leh remhre taka finance enkawltu CM Pu Zoramthanga hi kan chhuang tak zet a, minister hrang hrangte pawhin an department enkawl ṭheuh an chiang a, theihtawpin hna an thawk tih a lang," an ti a; kumina MLA inthlanpuiah MNF-in sorkarna an siam chhunzawm leh ngeina tur nia an ngaih thu an sawi.

MNF party chuan, opposition group leader Lalduhoma'n ngaihdam a dil ngai khawpa thil a thleng chu vanduaithlak an tih thu an sawi a; eptu MLA-te'n an party mipui beisei pha hlawm lo mahse an phâk tâwk ṭheuha ṭhahnem an ngaihnate lawmawm an tih thu an sawi bawk.