Falkawnah Zonun Kûtpui hmang

Art & Culture department leh Falkawn Joint NGO chuan nimin khan Chapchar Kût pualin Falkawn Zokhua (typical Mizo village)-ah Zonun Kûtpui an buatsaih a, Art & Culture minister R Lalzirliana'n a hawng. Zonun Kûtpui hi vawiin leh naktukah hman chhunzawm a ni ang.

R Lalzirliana chuan, Mizoram sorkarin Art & Culture department hmangin Zo fate inpumkhat zual zelna tur te, Mizo culture & tradition humhalh leh chawinun zel kawngah theihtawp chhuaha hma a lâk thu a sawi a, "Kumin aṭang hian huam zau leh darh zau zawnga kût kan hman theih nan ngaihtuahna ka han séng a, kum lo vei zelah huam zau zelin khaw tin, veng tinah leh hmun hrang hrangah a bika entir tur leh lawmnate kan buatsaih thei zel turah kan ngai," a ti.

Mizo hnam nun tak tak hmuh theiha pho chhuaktu Art & Culture department chu a pawimawh thu sawiin Minister chuan, "Hnam dang leh hmun dang aṭanga lo kalte'n Mizote culture an zirchianna atana mawhphurtu pawimawh tak leh a mawi apiang culture-a seng luh vengtu pawimawh tak a ni," a ti bawk.

Zonun Kûtpuiah hian hmânlaia Mizo nun dan te, Mizo la deh dan, bél vuak dan leh thang kam dante entir a ni.