Speaker-in ECB jubilee lawmpuina a pe

Bangladesh-a Zo hnahthlakte awmna khaw pakhat Pángkhua Para-a Evangelical Church of Bangladesh (ECB) kohhranin an kum 40-na, ruby jubilee an lawm lawmpui nan Assembly speaker Lalrinliana Sailo chuan Chittagong aṭangin Rs. 50,000 a hlân.

Bangladesh-a ECB kohhranin ruby jubilee an lawmnaah hian khuallian tura sawm a nih angin Lalrinliana Sailo hian tel tumin Chittagong a thleng a; mahse, Pangkhua Para hi Rangamati aṭangin lawnga kal a ngaih avang leh venhimna lam thil vangin Pangkhua Para a thleng thei lo. Hei vang hian Speaker hian Chittagong-a a thlenna hotel-ah Jubilee Organising Committee secretary Kross Remliana hnenah jubilee lawmpuina Rs. 50,000 a hlan a ni.

Jubilee Organising Committee Secretary (Rangamati Hill District Councill-a councillor ni bawk) chuan, Mizoram Assembly Speaker-in ECB ruby jubilee lawmpuina atana sum a pe leh Bangladesh-a Zo fate a hre reng chu lawmawm an tih thu a sawi a, "Mizoram sorkarin Bangladesh-a Zo fate min ngaihsakna avangin kan lawm hle. Unau ni mah ila, ram hranga awm kan nih avangin sorkarah tihfel tur a awm tam a, hun dangah chuan hma deuh zawkin thil tihfel theih ni se a lawmawm khawp ang," a ti.

ECB hian January 12 khan ruby jubilee an lawm a, Bangladesh-a Zo hnahthlak awmte chu khaw hrang hrang aṭang­in an kal khawm a ni.