MZU-ah G20 Business Meeting neih a ni; Mau hi dawithiam tiang ang mai a ni - CM

Group of Twenty (G20) Business Meeting (B20) chu nimin khan Mizoram University Auditorium-ah neih a ni a, ram hrang hrang palaite an tel. Chief minister Zoramthanga'n thu sawiin, mau ṭhatna a sawi a, mau chu thil ṭangkai tak, dawithiam tiang (magic wand) ang mai a nih thu a sawi.

G20 Business Meeting hi Confederation of Indian Industry (CII) huaihawta neih a ni a, hawnna inkhawmah Union External Affairs minister of state Dr R K Ranjan Singh leh Commerce and Industry minister of state Som Parkash an tel. Palaite hian vawiina hman tur Chakchar Kût an chhim dawn a, vawiin vêk hian Mizoram an chhuahsan ang.

CM Zoramthanga chuan, B20 meeting palaite chu Mizoram mipuiin an lo lawm thu sawiin, Mizoramah tualchhung thil hmang ṭangkaia industry lian dinna tur theihna ṭha tak a awm thu a sawi a, "Mizorama ramngaw 50% chuang hi mau awmna hmun a ni. Pathianin kan pi leh pute aṭanga min pek a ni a, mithiamte chhût dan chuan mau metric ton maktaduai 25 a awm a, a tam zawk chu hman ṭangkai loh a ni. Furniture, lehkhapuan leh thil dang siamna atan hman ṭangkai theih a ni a, magic wand ang mai a ni," a ti.

Kum 10 kal ta vel khan Delhi-ah sorkar laipuia Forestry joint secretary chu mau chungchang a sawipui tawh thu sawiin Zoramthanga chuan, "Mau hi June thla velah a tuai ṭan a, thla ruk hnuah chuan a puitling tiat a ni tawh. Thla ruk chhunga a puitling tiat ni thei thing dang in hri ang em? Mau hian thing lêt thum/li-in carbon a hîp ral thei a, thing aiin a let thum/ li-in oxygen a pe chhuak tam thei zawk," a ti a; khawvel hmun hrang hrangah industry aṭanga carbon chhuak nasa vanga buaina a awm laiin, Mizoram chuan carbon hîp ral chak tak mau a pe chhuak thei tih a sawi.

Mizorama mau awm sate ṭha hle mahse a aia lian zawk phun turin hmalak a nih thu sawiin Zoramthanga chuan, "Brandisii leh Latiflorus, ft. 50-60 a sang leh tehkualin inches 15-20 a lian ni thei, kûng khat hi mi pathumin an zâwn a ngai. Ka huanah ka nei a, ft. 10-ah ka tan a, a mau a chhah avangin ka pu hlei thei lo a, a dang la bàng chu mi pahnihin an zâwn a ngai," a ti.

CM chuan, Mizoramin airport ṭha tak a neih dawn thu sawiin, "Rél kawng leh kawngpui bakah, lawng hmanga kalpawhna kan nei dawn. Inkalpawhna ṭha tak kan nei," a ti a; chu'ngte chu India leh khawvel ram danga thil thawn chhuah nan hman ṭangkai theih a nih thu a sawi.

Mizoram chu mi nuai 10 vel chênna, ṭawng, sakhua, tlawmngai pawl leh hnam zia inang tlang nei a nih thu sawiin CM Zorama chuan, "Agriculture leh horticulture kaihhnawi thlai hrang hrang thar theihna a awm rualin, sawngbawlna hmun a awm loh avangin páwn lam aṭangin man to taka kan lak luh a ngai. Mizoramin economic molecule lian tak a nei a, chu chu hman ṭangkai a nih theih nan theihtawp chhuah turin ka sáwm che u a ni," tiin kal khawmte a sáwm.

External Affairs minister Dr RK Ranjan Singh chuan, Mizoram chu literacy rate sang tak a nih bakah English ṭawng hmang thei an tam avang leh ṭhalai lehkhathiam an tam avangin khawvel huap sumdawnna lamah pawh remchanna a awm theih thu a sawi a, "India hmarchhak state-te hi Asia chhim chhak ramte nen inlaichinna leh insumdawn tawnna atan an pawimawh hle a ni," a ti.

Commerce & Industries minister Som Parkash chuan, India chu khawvela start-up eco-system lian ber zinga mi a nih thu leh Mizoram leh hmarchhak state dangte chu investment tihna hmun ṭha a nih thu a sawi a; India hmarchhak bialah mau hmanga economy tihhmasawn hna thawh a nih dante a sawi bawk.

B20-ah hian sorkar laipuia Department for Promotion of Industry and Internal Trade principal economic adviser Rupa Dutta, Development of North Eastern Region joint secretary Harpreet Singh, CII North East Council co-chairman Pradeep Bagla leh Mizoram chief secretary Dr Renu Sharma te pawhin thu an sawi.

Chawhnuah Plenary Session neih a ni a, sumdawnna chungchang sawiho a ni.