Cheng nuai 268 tichingpena puh Musta Gur Rahman jail-ah dah a ni

MAMCO sum cheng nuai 268 tichingpena puh Musta Gur Rahman, Guwahati chu a tlanbona Delhi-ah man a nih hnuah nimin khan Anti Corruption Bureau (ACB)-in Aizawl an thlenpui a, Court thu angin jail-ah dah nghal a ni.

ACB chuan Musta Gur Rahman hi nimin khan Mizoram rawn thlen­puiin, Lengpui Airport aṭangin Special Court (Prevention of Corruption Act)-ah an hruai nghal a; Court chuan Central Jail-a dah turin thutlukna a siam a, a chungchang a ngaihtuah chhunzawm zel ang.

Tarlan tawh angin, MAMCO sum cheng nuai 268 eirûknaah ACB chuan December 3, 2015 khan thubuai an ziak lut a; an chhuinaah khatih laia MAMCO deputy manager Lalremthanga leh a consultant Musta Gur Rahman chu in­hnam­hnawihah puh an ni.

Mi pahnihte hi ACB-te'n an man hnuah bail-a chhuahtir an ni a, Musta Gur Rahman chu tlanbo zuiin, February 24, 2023 khan Delhi-ah man a ni.

Lalremthanga chu Special Judge (PC Act) chuan November 22, 2022 khan thiam loh a chantir tawh a, kum 5 chhung táng tur leh Rs 5,00,000 chawi turin a hrem.

Musta Gur Rahman man phalna (warrant of arrest) pawh court chuan a tichhuak nghal a, mahse, a tlanbo avangin man a ni lawk lo a, hun eng emaw chen hnuah man a ni ta a ni.