LMC inthlan hun March 29, 2023; Hmeichhe ward tur pali pawh a ni

State election commi­ssioner Laima Chozah, IAS (Rtd) chuan nimin khan Lunglei Municipal Council (LMC) inthlan hun atan March 29, 2023 ruat a nih thu a puang. Nimin vêk khan LMC inthlan tura hmeichhe ward turte pawh niin, ward no. II, V, VIII leh X-te pawh a ni.

LMC Inthlan puanna hun hi Lunglei DC Confe­rence Hall-ah hman a ni a, SEC chuan press mite hmaah a puang a ni. Inthlana chuh tumte tan March 10, 2023 tlai dar 3 thleng hming pek luh theih a ni dawn a, nomination paper-te chu March 13-ah endik tur niin, March 14 tlai dar 3 thleng inhnuhdawh theih hun hawn a ni ang. March 29 zing dar 7 aṭanga tlai dar 4 thleng vote thlak a ni ang a, April 3-ah vote chhiar a ni ang.

State Election Commi­ssioner chuan, election model code of conduct hman ṭan nghal a nih thu a sawi a; LMC inthlan chu dik leh felfai taka kalpui a nih theih nan mipui hriat ṭulte ṭhahnemngai taka puangzar a, mipui zirtirtu ni turin press mite a sáwm.

Tualchhung inrel bawlna atana inthlanah hmeichhiate tan seat awm zawng zawng aṭanga 33% hauh a ni a, LMC-ah hian ward 11 awmin, chu'ng zinga seat pali chu hmeichhe tan hauh a ni. Hmeichhe seat tur hi Assembly constituency-a Lunglei North, Lunglei East, Lunglei West leh Lunglei South aṭangin pakhat ṭheuh pawh a ni a, MHIP, YMA, MUP leh MJA aiawhte'n an pawt a ni.

State Election Commission buatsaiha nimina LMC hmeichhe ward tur pawhna inkhawm hi state election commissioner Laima Chozah-in a kaihruai a; Lunglei bawrhsap leh district election officer Ramdinliani, Lunglei SP Rahul Alwal, SEC deputy secretary R Vanrengpuia, thuthar thehdarhtu te, political party leh NGO aiawhte an tel.

Laima Chozah chuan, ram danpui leh Mizoram Municipalities Act, 2007 hnuaia tualchhung inrêlbâwlnaa hmeichhiate'n chanvo zau zawk an neih theihna tura an tana seat hauhsak a nih dan a sawi a, "SEC hi ram danpui hnuaia din constitutional body a nih angin hmalakna leh ruahmanna rêng rêng mipui hriat turte felfai leh langtlang taka tih ṭhin a ni a, hmeichhe tana seat hauh turte thlanna pawh langtlang taka kalpui a ni," a ti.

State Election Commissioner chuan, LMC inthlan neih tur chu felfai taka kalpui a nih theih nan an hma zâwna an tih tur ṭheuh ṭha taka hlen chhuak turin kal khawmte a chah.

LMC inthlan turah hian electronic voting machine hman a ni dawn a, polling station 44-ah vote thlak a ni ang.

Municipal election officer chu Lunglei DC Ramdinliani a ni. Party worker-te inkara boruak ṭha lo thleng thei pumpelh nan polling station bulah political party-te leh candidate-te awm khawm nan Common Election Camp pakhat chauh siam phal a ni dawn.