Anticipatory bail dilna hnâwl a ni

Aizawl District Court-a Special Judge (Prevention of Corruption Act) Dr HTC Lalrinchhana chuan March 1, Thawhṭanni khan mi pasarihte anti­ci­patory bail dilna a ngaihtuah a, a hnâwl.

Sorkar ukilte hnen aṭanga Vanglaini thu dawn danin, MGNREGS sum leh VEC sum tiching­pena puh Chhingchhip VC member hlui paruk leh hna thawk loa hlawh laa puh Julius Tangchangya s/o Kali Kumar Tongchangya (CADC chairman hlui)-te chuan anticipatory bail an dil a; Special Judge chuan a ngaihtuah hnuah a hnâwl a ni.

Chhingchhip VC hluite hi MGNREGS sum Rs 3,39,329 leh VEC sum Rs 17,035 tichingpena puh an ni a; an thubuai hi chhui mek niin, chargesheet thehluh a la ni lo.

Julius Tangchangya hi CADC sorkara thawk turin a nghet loa lak phawt a ni a, chumi hnuah a ngheta dah a ni. Dah ngheh a nih hma leh dah ngheh hnuah uchuak taka duhsak a, study leave kum 5 chhung pek a nia sawi a ni. CADC sorkara hna thawk tura lak a nih aṭanga kum 5 chhung chu office kal loin hlawh a la char char a; a thubuai hi chhui mek a ni.