KHAWTHLIR

CM leh German palai an inkâwm
G20 Business Meeting hmanga rawn zin German consul general Manfred Auster chuan March 1, Nilaini khan chief minister Zoramthanga a kâwm a; Mizoram economy chungchang, ṭhenawm ramte nena inlaichinnate leh ram inrina awm a nih vanga Mizoram pawimawhnate an sawi dun.

Thisen pe
Women Polytechnic NSS leh Red Ribbon Club-te chuan Women Polytechnic silver jubilee pualin nimin khan thisen pek an huaihawt a, Synod Hospital tan thisen unit 36 an pe a, petute hmeichhia 35 leh mipa pakhat an ni.

Bike chesualah thi
C Vanlalpekhlui (23) d/o C Biakhmingthanga, Armed Veng chu March 1, Ningani tlai dar 5 vel khan Champhai Ruantlang hnuai kawngpuia bike chesualah a thi. Thu dawn danin, C Vanlalpekhlui hi Vanlalruata Chhangte khalh bike hnungah a chuang a, an chetsualna hmunah hian a thi nghal a ni.

Zalenna sualtute kawmna buatsaih
Mizo Zirlai Pawl Gen. Hqrs chuan March 1, Nilaini khan MZP conference hall-ah Mizoram tana zalenna sualtute kawmna hun an buatsaih. Zalenna sualtute zinga mi - war secretary Vanlalngaia, senator Bualhranga, Brig.Gen. R Sangkawia leh Col. Lalrawnliana te kawm an ni a; zirlaite'n zawhna hrang hrang an zawt a ni. MZP tarlan danin, MNF-in Mizoram independence an puannaa hming ziaktu (signatory) mi 61 zingah mi pariat an la dam a ni.

Ngaihdam dilna MNF-in ropui an ti
MNF, Lawngtlai district chuan thuchhuah siamin, District Council & Minority Affairs minister R Lalzirliana'n autonomous district council chungchanga Assembly budget session-ah February 23, 2023-a a thusawi avanga Assembly House-ah ngaihdam a dil chu puitling an tih thu leh ropui an tih thu an tarlang a, "A ngaihdam dilna hi a patlingin ram hruaitu a nihzia a tilang chiang hleah kan ngai," an ti.

G20 pualin AR
Assam Rifles chuan G20 meeting pualin February 28, 2023 khan Painting Competition leh Cleanliness Drives an buatsaih a, zirlai 64 leh AR sipai 19 an tel. Assam Rifles chuan, Aizawlah G20 Business Meeting nghah a ni chu lawmawm an tih thu leh, chuta tan chuan AR-te pawh theihtawpa an inbuatsaih thu an tarlang a ni.

Pawisa fai tel loa indàwr dan zirho
Kolasib DC John LT Sanga chuan nimin khan Thingdawl community hall-ah self help group member-te pualin pawisa fai tel loa indàwr tawnna uar lehzuala kalpuina tur, National Campaign on Promoting Digital Transaction a hawng. Thingdawl leh Bilkhawthlir RD block hnuaia SHG aṭanga Business Correspondence Sakhi Yojna-te hnenah chak zawka digital transaction kalpuina hmanrua a sem nghal.