World Hearing Day hman a ni

National Programme for Prevention & Control Deafness (NPPCD) chuan nimin khan Hospital and Medical Education conference hall-ah ri hriatna lama inzirtirna ni, World Hearing Day an hmang. Mizoramah thla 10 kal ta chhungin ri hriatna ṭha lo leh ṭawng lama harsatna nei mi 3,625 hmuh chhuah a ni.

World Hearing Day hmanna inkhawm hi National Health Mission (NHM) mission director Dr Eric Zomawia'n a kaihruai a, Persons with Disabilities (PwD) commissioner Vanlaldiki Sailo khuallian a ni a; SCERT, Social Welfare, NILD-NERC, Ephata Society leh Redeem Garden Special School-te an tel.

Kumina Day thupui, 'Ear and hearing care for all' tih chu Civil Hospital, Aizawla ENT surgeon Dr Rita Zoramthari'n a sawi a; NPPCD consultant Dr Lalthanmawii Khalthangin NPPCD kalphung leh hmalaknate a sawifiah.

Dr Lalthanmawii Khalthang tarlan danin, sorkar kum kal mekah April 2022 aṭanga January 2023 thlengin beng lama harsatna nei mi 21,036 an inentir a, chu'ng zingah chuan ri hriatna ṭha lo mi 3,625 hmuh chhuah a ni.

PwD commissioner Vanlaldiki Sailo chuan, NPPCD hmalakna chu Pathian lâwm zawng a nih thu sawiin, "Beng hriatna lama harsatna tâwk te, rualban lohna dang neite thlenga dâwm kângtu ni turin theihtawp i chhuah zel ang u," a ti a; beng ṭha lote leh taksaa rualbanlote ṭanpuinaah theihtawp chhuah turin pawl hrang hrangte a chah.

Vanlaldiki Sailo chuan, Mizoramah sorkarin rualbanlohnaa a chhiar chi 21 a awm tih sawiin, "Cencus hnuhnung berah chuan district thar pathum tih loh Mizorama district 11-ah rualbanlo mi 13,415 an awm mek a, chu'ng zinga mi 3,600 chuang chu ri hriatna ṭha lo leh ṭawnga harsatna nei an ni. Heng mite tana malsawmna ni tur leh inthliarhranna awm loa harsatna tâwk mekte'n thlamuanga hun an hman theih nan mawhphurhna kan nei a ni," a ti.

NPPCD hi kum 2006-ah kalpui ṭan a ni a, Mizoramah chuan kum 2014 aṭangin kalpui a ni. Mizoram district thar tih lohah district dang zawngah kalpui mek a ni a, district thar pathumah pawh kalpui tuma hmalak mek a ni.