Vanglaini logo

LC leh VC a ruala inthlan a ni dawn Vawiinah inthlan hun puan tum a ni

Mizoram State Election Commission (SEC) chuan vawiin hian village council (VC) leh local council (LC) inthlan hun tur an puang dawn a; LC leh VC inthlan hi a ruala buatsaih a ni ang.

Vanglaini palai zawhna chhángin state election commis­sioner (SEC) Laima Chozah chuan, VC leh LC inthlan buatsaih turin engkim peih a ni tawh tih a sawi a, "Naktuk (vawiin) hian inthlan hun tur puan a ni dawn," a ti. SEC hian Covid-19 leng vangin VC leh LC inthlan a hunah an buatsaih thei lo a ni.

Laima Chozah chuan, VC leh LC hun hrana inthlan buatsaih tura ngenna an dawn thu sawiin, "Ngenna awm mah se, tun ṭumah hian a hrana buatsaih thut theih a ni lo. A hrana buatsaih tur chuan buaipui ngai tam tak a awm. Covid-19 vangin chêt zung zung theih a ni si lo a, ṭum khatah inthlan kan buatsaih mai a ngai dawn," a ti.

Nimin khan Vanglaini palai zawhna chhángin LAD minister K Lalrinliana chuan, VC inthlan buatsaihna atana LAD lamin a tih ve turte chu an tih vek tawh thu a sawi a, "SEC lamah thil ṭul pawh kan thehlut vek tawh," tiin, inthlan hun bituk chu SEC mawhphurhna a nih thu a sawi.

K Lalrinliana chuan, LAD minister a nihna aṭang chuan inthlan buatsaih ṭul a tih tawh thu a sawi a, "Covid-19 vanga buaina thar kan neite a nih loh chuan tun thlaah chuan inthlang hman ila ka duh. Tunah hian VC term ṭum hnih pawhsei a ni tawh a, VC ni mekte pawh hian nuam an ti vak tawh lo," a ti.

Aizawl Municipal Corpo­ration (AMC)-a Congress party councillor-te chuan July 14, 2020 khan SEC hnenah VC leh LC inthlan chu a ruala tih ni lo se an duh thu ziak leh ṭawngkain an thlen. Congress councillor-te chuan, AMC a pian hnuah Aizawl khawpuia VC chu LC tih an ni tih sawiin, a ruala in­thlan an duh loh chhante an tarlang.

Mizoram sorkar chuan Covid-19 léng vanga inthlan buat­saih theih a nih loh avangin VC leh LC ni mekte term chu September 7, 2020 thleng a pawtsei mek a; term tàwp hun pangngai chu May 7, 2020 a ni. VC leh LC term hi sorkar chuan thla thum chhung atan August 7, 2020 thleng a pawtsei phawt a, chumi hnuah September 7, 2020 thleng a pawhsei belh. Harsatna bik a awm a nih chuan state sorkarin thla 18 thleng VC/LC term pawtsei turin thuneihna a nei a ni.