Lirthei khu endikna dah belh dawn

Mizoram Pollution Control Board (MPCB) chuan Hlimena Transport department hmunah leh Rangvamualah lirthei khû tehna an hawng thar dawn a, Bawngkawna mi an titawp dawn thung.

February 28, 2022-a MPCB hotute ṭhutkhawmnaa member secretary C Lalduhawma’n a sawi danin, Hlimena Transport department hmunah leh Rangvamualah lirthei khu endikna buatsaih niin, hawn tura peih a ni tawh a, remchang hmasaah Transport Minister-in a hawng ang.

MPCB hian district thar pathum bakah, khaw pawimawh zual 15-ah boruak bawlhhlawh endikna tur an din belh mek a, tun March thla chhungin peih hman tum a ni. MPCB laboratory atan khawl changkang zawk, heavy metal endik theihna tur Atomic Absorption Spectrophotometer bun thar a ni bawk.

Ṭhutkhawmah hian, Mizorama lui tui bawlhhlawh zel tur ven a ṭulzia leh tuihna tihpun a pawimawhzia sawi a ni a; lui hnár lama lo leh huan neite'n hnim thahna hlo leh leiṭha hlauhawm chi an hman loh a pawimawh avangin a kaihhnawih department-ah hriattir ni se, an ti.

National Green Tribunal-in Maudarh quarry chim kaihhnawihah environmental clearance neih loh vanga lung latute cheng vbc. 70 chawi tura a tihna kal zelah, quarry nei zawng zawng tan environmental clearance lak a ngaih thu an sawi a; hemi chungchangah hian sorkar finchhuah an rêl.

Plastic bottle (PET) hrang hrangin ram a tihbawlhhlawh nasat dan leh a hnawk dante an sawiho a, zirchianna neih ni se, a ṭul anga sorkarah thurawn thlen zel ni se, an ti bawk.