G20 vanga hawker-te inzawrh khap; MPCC-in retheite rahbehnaah an ngai

Congress party thupuangtu Dr Lallianchhunga chuan thuchhuah siamin, Aizawlah G20 meeting nghah a nih avanga March 1-3 chhung Aizawla hawker-te inzawrh khap a ni chu mi harsa leh rethei zawkte rahbehna dik takah Congress party-in an ngaih thu a tarlang.

MPCC Media chairman Lallianchhunga chuan, "MNF sorkarin G20 palai lo kal mikhualte kalna tur kawngpui dunga ni tin eichawp zawng, dawrkai hawker-te March 1-3 chhung an inpho a khap hi ni tin eichawp zawng, mi harsa leh rethei zawkte rahbehna dik tak a ni. Kan nihna dik tak thup tuma hetianga mi harsa zawkte sum lak luhna tikhailak zawnga hmalakna hi hriatthiam theihah Congress party chuan kan ngai lo," a ti.

Mizoramin khual ṭha chi hrang hrang leh ṭhutkhawm pawimawh tak takte a lo thleng tawh ṭhin tih sawiin Dr Lallianchhunga chuan, "Tun anga mi rethei zawkte rahbehna hi a la thleng ngai lo. Hun lo kal leh zel turah pawh thleng tawh lo se kan duh. Mizote hi kan nihna ang taka kan lan chhuah ngam a ngai zawk niin kan hria," a ti a, chu chu Mizoram tan a ṭha zawka an ngaih thu a tarlang.

Congress thupuangtu chuan, Mizoramin G20 Business Meeting pawimawh tak a thleng chu lawmawm an tih thu leh Mizoramin hlâwkna lian tak a neih phah an beisei thu a tarlang bawk.