Champhaiah ruihhlo hâl ral a ni

Champhai District Drugs Disposal Committee leh District Narco Coordination Centre (NCORD) ṭangkawp buatsaihin nimin khan Champhai District Hospital-a bawlhhlawh hâlnaah ruihhlo hâl ralna hun hman a ni a, Champhai North bialtu MLA Dr ZR Thiamsanga'n hmanpuiin a dep kai.

Ruihhlo hâl takte chu Champhai district police-te'n nikum April leh September inkara an man, thubuai kal lai mek (pre-trial) tihral phalna hmuh tawhte a ni a; ruihhlo hâl tâk hlut zawng chu tualchhung rate angin cheng nuai 1,738.60 a ni.

Dr ZR Thiamsanga chuan, ruihhlo donaa Champhai district-a thawhhona ṭha leh duhawm tak a awm chu fakawm a tih thu sawiin, "Chhun leh zan pawh sawi loa indaih lo leh hmanraw mamawh angte pawh nei lo chunga police leh force dangte'n ṭhahnemngai taka ruihhlo in do ṭhin hi in chhuanawm tak zet a ni," a ti.

Golden Triangle bul hnai leh Indo-Myanmar ramria awm Champhai district-a ruihhlo donaah harsatna tam tak tawh ṭhin a nih thu sawiin ZR Thiamsanga chuan, "Pawisawilo mihring nunna tam tak suattu, mimal, ram leh hnam tlûkchhiat bul ṭanna thâ thlah loa do zel a ni hi a ropui," a ti a, ruihhlo ti chhin lo tura inzirtirna nasa zawka kalpui a pawimawh thu a sawi.

Champhai DC James Lalrinchhana pawhin thu sawiin, "Ruihhlo tawlh leh zuarte lungrual taka do zel tum a ni a, man chhuahte kan hâl ral zel dawn a ni," a ti.