AMC-in free wifi a dah nawn
Aizawl Municipal Corporation (AMC)-in Aizawl khawpuia hman tur free wifi an buatsaih pahnihna chu nimin khan AMC Auditorium-ah mayor PC Lalhmingthanga'n a hawng.
PC Lalhmingthanga chuan, November 2016 aṭangin Aizawla hmun pasarihah free wifi an pek tawh thu sawiin, "Kum khat vel a kal hnuah contractor lamin an tih ṭhat theih loh avangin chhunzawm theih a ni lo. Tun ṭumah hian Express Wifi-te chu ṭha taka ti thei turin kan beisei. An performance kan en ang a, an tih ṭhat chuan kan thawhpui zel ang a, tun aia zau zawk pawh thawhtir zel tlakin thawk se kan duh," a ti.
Aizawl Mayor chuan, AMC-in Aizawl hmasawnna atan theihtawp an chhuah thu sawiin, "Bawlhhlawh paihahte hriat kan hlawh a, development lamah pawh theihtawp kan chhuah. Kan hmalakna pakhat free wifi-ah hian contractor kan hmuh angte kan han pe a, duh angin an hlawhtlinpui lo. Tun ṭuma kan contractor thlante hi chu experience nei sa an ni a, beiseina sang tak kan nei a ni," a ti a, free wifi chu zirlaite'n an hman ṭangkai an beisei thu a sawi.
AMC hian free wifi hi Aizawl khawpui chhung hmun 24-ah an dah a, hotspot 116 awmin, mi pakhatin ni khatah data 1.5 GB an hmang thei dawn a ni. AMC hian Aizawl hmun ṭhenkhata internet free wifi an dah chu December 22, 2016 khan Govt. Aizawl College-ah an hawng tawh a, Nextcomm-in an pek chhuah a ni. Aizawla college pasarih - GAC, Johnson College, Aizawl West College, T Romana College, Hrangbana College, Aizawl North College leh J Thankima College-ahte dah a ni. Chutih laiin, free wifi chu a ṭhat tâwk loh avangin December 13, 2017-a AMC Board of Councillors thutlukna angin contractor chu insawifiah tura tih a ni.