Mipuiin Vaṭhuampui kawng siam an tichhia

Vaṭhuampui Joint Action Committe (JAC) chuan, Saibawh leh Vaṭhuampui inkar kawng siam mekah, Chikhurlui leh Vaṭhuampui inkara  contractor-in plain cement concrete (PCC)-a kawng a siam dan chu a nih tur ang a nih loh avang leh a chhiat lutuk avangin August 3, Thawhṭanni khan hnatlangin an chhu chhia.

Kawng siam tihchhiatna hnatlangah hian Vaṭhuampuia mipa 350 chuang an thawk chhuak a, a huaihawttu JAC chu VC-te leh pawl hrang hrangin an ṭawiawm a ni. Vaṭhuampui JAC chuan, Saibawh leh an khaw inkar kawng ṭha neih chu an khua leh a chhehvela mipuite'n kum tam tak an nghah tawh a nih thu sawiin, "Contructor hian a siam dan tur ang ni loin hna an thawk tih kan hria. A nihna ang tak chuan rawra, cement leh balute rualkhai taka chawhpawlh tur a nih laiin, rora an hmang lo. GSB (rawra nâwi), lei leh cement tlemtê chawh pawlhin plaster hna an thawk a ni," an ti.

JAC tarlan danin, GSB, lei leh cement hmanga an plaster tawh sa chu mau leh nihliap hmangin chhun khawh theih vek a nih bakah, kut pawha hmeh keh theih vek a ni. Contructor-in dik lo taka hna an thawk chu mipui zah loh­naah an ngai a, a rang lama hma la turin sorkar an ngen a ni. Saibawh-Vaṭhuampui kawng chu Vaṭhuampui leh a chhehvel khuaa mipuite tan kawng pawimawh ber a nih avangin estimate ang thlapa siam turin contractor an beisei tih sawiin JAC chuan, "A nihna ang taka siam a nih theih nan hma kan la zel dawn a ni," an ti.