Hmun hrang hrangah Chapchàr Kût hman a ni

Nimin khan Mizoram hmun hrang hrangah Chapchar Kût hman a ni a, minister leh MLA ṭhenkhatte'n an hmanpui. Mizo hnam làm, zai, hnam nunzia lantirna chi hrang hrang entir a ni.

LUNGLEI

Chapchar Kût hi Lungleiah chuan Ṭhuamluaia Mualah hman a ni a, Mizoram Youth Commission chairman Dr Vanlalṭanpuia, MLA kût pa niin, bawrhsap Ramdinliani kût thlengtu a ni.

Lungleia Chapchar Kutah hian mi ṭhahnem tak an tel a; YMA, MZI, MHIP, MCAA leh MCO-te'n hnam làm leh zai chi hrang hrang an entir a; hnam làm entirte chu párlàm, sárlàmkai, chheih làm leh chài, solakia, chawnglaizawn leh cherawte a ni.

MJA, Lunglei District-in Chapchar Kût Miss an thlang a; Lunglei Photographers’ Association-in Kût Hraite an thlan bakah, photograph exhibition an buatsaih bawk.

SIAHA

Siahaah chuan District Playground-ah Chapchar Kut hman a ni a, Lakher Pioneer Mission hnuaia kross sipai la dam awm chhun Rev.Dr C Thalai, kum 93 mi chu kut pa niin, bawrhsap Lalhmunsanga Hnamte chu kut thlengtu a ni.

YMA, MHIP, MUP, MChP leh LWA-te bakah, sikul hrang hrangin hnam lam leh zai an entir a, Miss Chapchar Kut atan S Remruatsangi, New Siaha East thlan niin, Mister Chapchar Kut atan Lalmuanthanga, New Siaha West thlan a ni.

CHAMPHAI

Champhaiah pawh Champhai District Chapchar Kût Organising Committee buatsaihin Zotlang Sports Stadium-ah Chapchar Kût hman a ni a, Health & Family Welfare Board vice chairman Dr ZR Thiamsanga, MLA chu kût pa niin, bawrhsap James Lalrinchhana kût thlengtu a ni.

Dr ZR Thiamsanga chuan, Zo fate inpumkhatna lantir nana mi tin tel theihna Chapchar Kût hman a ni chu lawmawm a tih thu sawiin, ṭhenawm ram buai vanga Zo hnahthlak ráltlânte chu Mizoramah thlamuang taka awm turin a chah a, "Chapchar Kût hian inpumkhatna leh inpawh tlànna ṭha zawk a siam ṭhin a ni," a ti.

Champhai khawpuia pawlte bakah, Dungtlang leh Myanmar aṭanga Zo hnahthlak ráltlânte'n hun an hmang a; naupang hnam thuama inchei nalh, Kût Lanu leh Kût Val thlan a ni.

KOLASIB

Chapchar Kût hi Kolasib-ah chuan Ṭumpui khelmualah hman a ni a, bialtu MLA K Lalrinliana, minister chu kût pa niin, bawrhsap John LT Sanga chu kût thlengtu a ni. Assam-a district pahnih - Hailakandi leh Cachar district bawrhsap leh superintendent of police-te pawh an tel.

Kolasib-a Chapchar Kûtah hian YMA Sub Headquarters, Kolasib district leh Mizo Cultural Organisation-te'n hnam làm chi hrang hrang an entir a, MHIP-te'n Párlâm entirin, MUP-te'n hlado an chham thung. Kum 2020 leh 2023 inkara thisen pe ngun ber mi pathum hnenah chawimawina thuchei hlan a ni bawk.

SERCHHIP

Serchhipah chuan Leisekawt Mualah Chapchar Kut hman a ni a, bawrhsap Nazuk Kumar chu kût nu niin, YMA Sub-Headquarters president Kawlṭhuama kût thlengtu a ni. Bawrhsap chuan, Chapchar Kut chu chhungkua, ṭhenawm leh khawtlangte inremna leh inṭanpui tawnna atan hmang turin mipui a chah.

Serchhipah hian khawpui chhung leh a chhehvela YMA branch, MHIP leh sikulte'n hnam làm leh zai an entir a, rimawi hmanga intihhlimna buatsaih zui a ni.

LAWNGTLAI

Lawngtlaiah chuan bawrhsap pisa tualah Chapchar Kût hman a ni a, Legislative Assembly deputy speaker H Biakzaua kût pa niin, bawrhsap David Lalthantluanga kût thlengtu a ni.

YLA, MHIP, MUP leh zirna-in hrang hrangin hnam làm leh zai an entir a; Phawngpui Photographers' Association-in Chapchar Kut Miss atan T Vanlalzahawmi, Lawngtlai Electric Veng an thlang a, Chapchar Kut Little Miss-ah Eunice Lalhriatzuali Fanai (3), Bazar Veng leh Little Mister-ah Manase H Lalrammuanpuia, Council Veng an thlang bawk.

MAMIT

Chapchar Kut hi Mamitah chuan GSA Khelmualah hman a ni a, bawrhsap Lalnunhlua kut pa niin, YMA Sub-Hqrs president Vanlalchhuanga Chhangte chu kût thlengtu a ni.

Mamitah hian khawpui chhung bakah, West Phaileng leh Reiek aṭangin YMA, MHIP, MCO leh sikulte'n hnam làm leh zai chi hrang hrang leh Mizo infiamnate an entir a; thlalak intihsiakna buatsaih a ni bawk.

SAITUAL

Saitualah chuan Keifang Centenary Sports Complex-ah Chapchar Kût hman a ni a, Art & Culture minister R Lalzirliana kut pa niin, bawrhsap VL Hruaizela Khiangte chu kut thlengtu a ni.

Saitual khuaa YMA branch-te'n cheraw, sarlamkai leh khuallam an entir a, Saitual College-in hmànlai aṭanga tunlai thlenga Mizo inthuamna (costume parade) an entir. MUP, Saitual Area-in hlado an chham a, MHIP Sub-Hqrs ten párlàm an entir bawk.

KHAWZAWL

Khawzawlah chuan YMA Sub-Hqrs Field, Zuchhipah Chapchar Kût hman a ni a, district bawrhsap CC Lalchhuangkima kût pa niin, Khawzawl Sub-Hqrs YMA president K Lalnunsanga kût thlengtu a ni.

Khawzawla Chapchar Kûtah hian Mizo hnam ziaráng lang thei hrang hrang entir a nih bakah, Mizo ei leh in hrang hrangte pho chhuah a ni a; Khawzawla pawl hrang hrangte bakah, Kawlkulh Joint YMA, Khawhai Branch YMA, Rabung Branch YMA leh Ngaizawl Branch YMA-te'n hun an hmang.

VAIRENGTE

Vairengte-ah pawh YMA Khelmualah Chapchar Kut hman niin, minister Lalrinawma kût pa a ni a; YMA, MHIP leh Cultural Club-te'n Mizo hnam làm leh ziaráng hrang hrang an entir a ni.

SHILLONG

Shillong Mizoram House-ah pawh Chapchar Kût hman a ni a, Human Resource Development Board vice chairman Dr L Thangmawia kût pa a ni.