Chapchar Kût hlim taka hman a ni

Nimin khan Mizoram hmun hrang hrangah hlim takin Chapchar Kût hman a ni a, thupui chu 'Zo fate inpumkhatna' tih a ni. Kût hmanna pui ber Lammualah chuan chief minister Zoramthanga chu kût pa niin, Legislative Assembly speaker Lalrinliana Sailo kût thlengtu a ni a, G20 Business Meeting-a tel palaite pawhin an chhim.

Chief Minister chuan thuchah sawiin, "Covid-19 hripui léng vanga kum hnih chhung chu pangngai taka kût hman theih a nih loh hnuah vawiina ropui taka mipui ṭhahnem tak nen a huhoa kût ho theih a ni ta hi a lawmawm hle," a ti a, kût chibai mipui a bûk.

Zoramthanga chuan Chapchar Kût chu Mizoramah G20 hnuaia meeting pakhat B20 meeting Aizawla nghah nen a hun a innang tih sawiin, "Ram hrang hrang aṭanga meeting-a tel tura lo kalte'n Mizo kûtpui an rawn chhim ve theih phah a, a lawmawm hle a ni," a ti.

Kut Pa chuan, kût thupui angin Chapchar Kût chu Mizoram chhung leh páwn, khawvel hmun tina awm Mizote suih khawmtu leh inpumkhatna thlentu ni se a duh thu a sawi a; harsatna karah inpumkhatna chhawm nung zel turin Zo fate a sáwm.

Kut thlengtu Lalrinliana Sailo chuan, kût hmang tura kal khawmte lawmna thu sawiin, "Hnam ziaráng chawi lâr zel thiam a, pi pute nun dan leh tih ṭhin danah a ṭha lo lai paih a, a ṭha lai chhawm nung zel tur kan ni," a ti. Central YMA president R Lalngheta'n thu a sawi bawk.

Chapchar Kût hmannaah hnam làm leh zai hrang hrang te, rimawi tum, Mizo infiamna leh hmânlai aṭanga tunlai thlenga Mizote nun dante entir a ni a; B20 hmanga rawn zin palaite pawhin chhimin, Mizo mipuite nen hun hlimawm tak an hmang a ni.

Chapchar Kût pual hian Vanapa Hall-ah IPR department leh pawl dangte ṭangrualin Photography Exhibition leh Painting Exhibition an buatsaih a; Aijal Club Park-ah Flower Show buatsaih a ni bawk.