ILP endik turin YMA-te chah

Central YMA chuan, YMA branch, group leh sub-headquarters-te chu August 4-8, 2020 chhungin an huam chhung ṭheuha hnam dangte zingah Inner Line Permit (ILP) endik rûnpui nei turin an chah.

CYMA thuchhuak chuan, tun hnaiah hnam dang, Mizorama hna thawka inhlawhfa tur hmun hrang hrangah an pung leh taa hriat a nih thu a tarlang a, "Hetiang hi kan dinhmun a nih leh tâk avangin YMA sub-headquarters, group, branch-te kan huam chhung ṭheuh ṭha zawka vil a, ILP endik rûnpui tunkar (August 4-8) chhunga nei ṭheuh turin kan inngen e. Kan hmalaknate a remchan dana CYMA-ah hriattir ni se," a ti.

Covid-19 léng laka Mizoram a him theih nan ILP pek chhuah ṭhin chu hun eng emaw ti chhung atan tihtawp lailâwk a nih thu sawiin CYMA chuan, YMA sub-headquarters, group leh branch chhungah kan phak ang tâwkin hmalak a ni a, hripui laka kan him theih nan hnam dang min chênchilhtute chhinchhiahna kal pui mek a ni," an ti. Mizo ṭhalai tam zawkte’n kut themthiamna hman ṭangkai hun atan hripui léng vanga hun khirh thleng mek chu hman tum turinYMA-te an chah bawk.

Thawhṭanni vêk khan Rapid Antigen Test (RAT) hmangin Aizawlah mi 41 (mipa 31 leh hmeichhia 10) endik niin, hripui vei mi 10 hmuh chhuah a ni. Mi 10-te chu 24-35 inkar, Assam, Nagaland, Himachal Pradesh, Jammu & Kashmir leh Punjab aṭanga rawn lutte an ni a, Assam Rifles sipai pakhat tih loh chu civil mi vek an ni. Lunglei Civil Hospital (LCH) laboratory-ah Truenat-PCR hmanga mi 27-te sample endikah Covid-19 vei mi paruk hmuh chhuah a ni a, an vaiin Mélte-a 131 battalion BSF sipai, Sazaikawn Multipurpose Hall-a khung hran mek an ni. Mi parukte hi kum 24-48 inkar an ni a; Bihar, Jharkhand, Odisha leh Uttar Pradesh aṭanga July 24, 2020-a Mizorama rawn lut an ni.

Serchhipah RAT hmanga mi 10 endik zingah Covid-19 vei Assam Rifles sipai pakhat, kum 34 mi hmuh chhuah a ni a, tun hnaia Assam aṭanga rawn lut a ni. RAT hmang vêka Kolasib district-ah mi 57 leh Lengpui Airport-a mi pathum endikte chuan hripui an vei lo thung.