KHAWTHLIR

CM nen inkâwm
Chief minister Zoramthanga leh Indian Association of Japan president Dr Sanjay Mehrotra chu March 2, Ningani zingah khan CM banglaah an inkâwm a; Japan rama electronic technology hmasawnna leh Mizoram nena thawh dun theihna tur remchang awm theite an sawi dun.

MLA-in CCTV hlân
Aizawl North-II bialtu MLA Dr Vanlalthlana chuan nimin zing khan Ramhlun Venglai YMA Committee Room-ah a bial chhunga YMA branch panga leh welfare pakhat hnenah CCTV a hlân. MLA hian kum 2022 khan a bial chhungah CCTV a lo sem tawh a, veng chhung leh police-te aṭangin an chhawr ṭangkai avanga dah belh tura ngenna a awm angin MLA fund hmangin CCTV a lei belh a ni.

B20 palaite haw
Group of Twenty (G20) hnuaia meeting pakhat, Business Meeting (B20)-a tel palaite chuan nimin chawhma lam khan Lammualah Chapchàr Kût an chhim a, chawhnu lamah Mizoram chhuahsanin an hmun lam an pan.

KTP Rorel
KṬP Rorel Inkhawm vawi 10-na chu nizan khan Zemabawk Kohhran biak-inah ṭan a ni. Inkhawmpuiah hian vawiinah rorel a ni ang a, Pathianni zanah a ṭiak ang. Rorel Inkhawm hi general conference neih loh kuma neih ṭhin a ni.

Puanṭhui khawl hlan
Shri Ratan Lal Foundation, Delhi chuan March 2, Ningani khan CSR aṭanga Rs 2,00,000 senga an lei puanṭhui khawl 28 chu Mizoram Police Wives’ Welfare Association tan Police Headquarters-ah an pe. Puanṭhui khawlte hi hmeichhia, puanṭhui leh kut themthiamna lam zirtirna hmanrua atan ruahman a ni.

Serte haw rûnpui
Minister C Lalrinsanga chuan nimin khan Serte khuain haw rûnpui an buatsaih a hmanpui a, haw rûnpui lungphun a hawng. Minister chuan, Serte khaw mipuite chu rinawmna leh taimakna nen theihtawp chhuaha hma la zel tura chahin, an khaw hmasawnna turah hmalakpui zel a tum thu a sawi.