Union Rural Development Minister-in Inthlahdahah Mizoram sorkar a puh

Union Rural Development minister of state Faggan Singh Kulaste chuan, kum 2021-22 chhunga Pradhan Mantri Awas Yojna (PMAY) hnuaia in sak ṭanpuina Mamit district-a pek tur mi 2,237-te sorkar laipui aṭanga sum pek vek tawh a nih laia in 494 chauh sak zawh a ni leh, tun hnaiah mi 1,743 hnenah first instalment pek chauh a ni chu state sorkar inthlahdah vang a nih thu a tarlang.

BJP, Mizoram Pradesh-in Faggan Singh Kulaste press statement nimina an tarlanah, tun hnaia ni hnih chama Mizoram a tlawh chhungin Mamita sorkar laipui hmalaknate thlirletna hun a hmanpui thu a tarlang a, "Mamit district-a PMAY pek tura sorkarin kum 2021-22 chhunga a pawm chhungkua 2,237 leh central aṭanga pawisa pek vek tawh siah in 494 chauh zawh fel a nih thu leh mi 1,743 chu tun hnaiah first instalment pek chauh a nih thu sawi a ni hi a pawi hle," a ti.

Union Minister chuan, PMAY chungchangah kum 2022-23 chhunga hmalakna official report fel tak an nei thei lo chu ṭha lo a tih thu a sawi a; Mizoram sorkara Rural Development Secretary leh Mamit DC-te chu an data kawla fel lo awmte tidik a, update data nei turin a hriattir a ni.

Faggan Singh Kulaste chuan, PMGSY kawng sialah phase I & II siam zawh turah km. 340 la siam zawh loh a awm chu pawi a tih thu a tarlang a, "Km. 42 siam loh a la awm chu state sorkar inthlahdah vang a ni. Official-te'n PMGSY phase-III hnuaia kawng siam zat tur leh ruahmanna information an hre lo chu a ṭha lo hle," a ti.

Ayushman Bharat Card (PM Health Care/Insurance Scheme) te, sikula zirtirtu indaih lohna nasatzia te, zirna-in hrang hranga a nih tura anga awm lo leh drop out rate san dan te, PM Free Gas Connection Scheme leh PM Kisan Niddhi chungchangah Faggan Singh chuan, "Central minister-te'n vawi tam tak Mamit district an tlawh a, hmalak dan tur DC hoa an sawi hnu pawha hmalakna hmuh tur awm lo chu state sorkar leh district administration inthlah dah vang liau liau a ni," a ti a, pawi a tih thu a tarlang.

Amrit Sarovar hnuaiah tui dah khawlna 75 siam tur chu August 15, 2023 hmaa siam turin Union Minister chuan Rural Development Secretary leh Mamit DC-te a chah a; MGNREGA (ni za inhlawhna) pawh aadhaar linked account hmanga langtlang taka engkim kalpui turin RD Secretary leh Mamit DC a hriattir bawk.