Kum 2018-19 aṭangin Mizoram sorkarin mau atan Rs 30,37,30,561 hmang

Mizoram sorkara Hosticulture department-in kum 2018-19 aṭangin Rs 6,48,16,750 man mau/ rua ṭiak 8,49,425 an sem tawh a, mau/rua sawng­bawlna kaihhnawih buai­puina leh bamboo plan­tation atan ṭanpuina Rs 30,37,30,561 an pe tawh.

Legislative Assembly budget session neih zawh taka Horticulture department enkawltu chief minister Zoram­thanga'n ZPM member Dr Vanlalthlana zawhna ziaka a chhàn danin, kum 2018-19 aṭanga 2022-23 thlenga Mizoram sorkarin mau/ rua sawngbawlna tur kaihhnawih atana sum a pek chhuah zawng zawng chu Rs 13,07,29,600 a ni a, bamboo plantation atan ṭanpuina Rs 17,30,00,961 a pe bawk a; a vaiin Rs 30,37,30,561 a ni.

Mizoram sorkar chuan SEDP hnuaiah kum 2020-21 khan Hmunpui ramah bamboo link road siam nan Rs 50,00,000 a hmang a; kawng siam hna chu Horticulture department-in May-September 2021 chhungin an thawk.

Horticulture depart­ment hian kum 2021-22 khan SEDP hnuaiah March-April 2022 chhungin Hmunpui rama Saiphai zauah Rs 55,00,000 hmangin bamboo link road siam hna an thawk bawk.

Kum 2019 aṭang khan mau/ rua chìnnaah Mizoram sorkarin Rs 6,48,16,750 a séng a; bamboo plantation bik atan kum 2020-21 chhungin mi 201 hnen­ah ṭanpuina Rs 1,13,761 ṭheuh leh, Ex-MNA Multipurpose Coope­rative Society Ltd. hnenah Rs 2,90,37,000 pek a ni.

Kum 2021-22 khan mi 1,274 hnenah ṭanpuina Rs 87,500 ṭheuh pek a ni a; kum 2022-23 khan mi 537 hnenah Rs 15,000 ṭheuh pek a ni. Kum 2022-23 chhung vêkin Ex-MNA Multipurpose Cooperative Society Ltd. hnenah Rs 15,68,000 pek a ni bawk.

Mau sâwngbàwlna kháwl dinna leh enkawlna, furniture, bamboo board/mat/sheet/floor tile/stick siamna leh mau zirchianna atan kum 2018-19 khan Bamboo Development Agency (BDA) hnenah Rs 4,29,29,600, NUTECH hnenah Rs 60,00,000 leh FRCBR hnenah Rs 25,00,000 pek a ni a; a vaiin Rs 5,14,29,600 a ni.

Mau sâwngbàwlna kháwl dinna, enkawlna leh a kaihhnawih atan vêk kum 2019-20 khan BDA hnenah Rs 1,25,00,000, VB Ecofriendly Production leh Bisons Private Limited hnenah Rs 2,00,000 ve ve pek a ni a; a vaiin Rs 1,29,00,000 a ni. Kum 2020-21 khan BDA hnenah Rs 1,52,00,000 leh NECBDC hnenah Rs 4,90,00,000 pek a ni bawk a, a vaiin Rs 6,42,00,000 a ni.

Mau sâwngbàwlnaa hmalakna atan kum 2018-19 khan mi pahnih - Ngurthansanga Sailo, Luangmual leh Roparliani, Hunthar Veng hnenah Rs 10,00,000 ve ve pek niin, a vaiin Rs 20,00,000 a ni a; kum 2019-20 khan mi pathum - R Lal­chhuanmawia, Lalram­nghaki leh Lalrawng­bawli, Edenthar Veng vekte hnenah Rs 1,00,000 ṭheuh pek a ni bawk.