VC hnena sem tur computer 118 lei nan LAD-in Rs 45,33,465.25 an hmang tawh

Local Administration Department (LAD) chuan January 2019 aṭanga January 2023 thlengin Mizorama village council (VC) 118 hnena sem tur computer leh a ken tel thilte leina atan Rs 45,33,465.25 a hmang a, VC 104-in dawng tawhin, VC 14-in an la dawng lo.

RTI Act hmanga zawhna LAD-in an chhan danin, VC-te hnena computer sem chu Ministry of Panchayati Raj hnuaia Rashtriya Gram Swaraj Abhiyan (RGSA) component pakhat, e-Ena­blement aṭanga sem a ni a, chuta tan chuan Rs 46,00,000 vel hmuh tawh a ni.

Sum hmuh tawh aṭang­in VC 118 hnena pek tur computer leina atan Rs 45,33,465.25 hman a ni tawh a, chawhrualin computer pakhat man Rs 38,419.19 zel ang a ni. Compurter chu a dawngtu tur VC-te khua/vengah hlân loin, VC-te'n LAD aṭangin an lam ṭhin.

LAD-in VC-te hnena pek tur computer leh a kaihhnawih a lei tawhte chu - personal computer 118, printer 50 leh uninterruptible power supply (UPS) 108 a ni.

LAD SPIO chuan, computer leh a kaihhnawih bungrua semte chu sorkar duh dan angin Government e-Marketplace (GeM) portal kaltlanga lei a nih avangin a supply-tu mimal hming a awm thei lo niin a tarlang a, "GeM kaltlanga lei a nih avangin a hranpaa tender chhuah a ngai lo," a ti.