ADC-te hmangaih berah MPCC an inchhál

Mizoram Pradesh Congress Committee (MPCC) chuan thuchhuah siamin, Congress party chu autonomous district council (ADC)-te leh a chhunga cheng hnamte hmangaih bertu an nih thu an tarlang.

MPCC chuan, "Congress party hi district council-te leh a chhunga cheng hnam hrang hrangte hmangaih bertu a ni tih chu anmahni hian an hre chiang a, kawng hrang hrangin kan la hmangaih chhunzawm zel dawn a ni," tiin an tarlang a ni.

District Council and Minority Affairs minister R Lalzirliana'n ADC-te chungchanga thu a sawi chu mi ṭhenkhatin Congress party beihna remchangah an hmang tih sawiin MPCC chuan, "Ngaihdam dil ngai khawpa thu a sawi sual, mi ṭhenkhatte'n Congress party beihna remchanga an la hmang ṭâlh hi ngaihdam diltu leh ngaidamtute tih bawrhbànna a ni a, a pawi hle. Huat tlakah ngai ila chuan Congress party hi Pu R Lalzirliana thusawi haw ber tur kan ni ang," an ti.

Congress party chuan, R Lalzirliana’n thu a sawi sual avanga ngaihdam a dilnaah an ngaihdam thu leh, ngaihdam dil ngai loa thu sawi ṭhin tawh tura an duh thu an tarlang bawk.

MPCC tarlan danin, July 4&15, 2009 khan ADC-te'n sorkar laipuiah direct funding an dilnaah chief minister Lal Thanhawla leh Lok Sabha MP CL Ruala ten ngenpuina an thlen tawh a, August 17, 2017-a Council of Ministers meeting pawhin Cabinet memo item no. 10-ah, 'Council of Ministers chuan district council-te direct funding pek hi kan thláwp a, a kalphung te, financial control mechanism leh administrative structure/set-up te chu Govt. of India-in duang rawh se,' tiin thu an dah a ni.