Dr Beichhua'n SEDP a tlangzarh

Animal Husbandry & Veterinary (AH&Vety) minister Dr K Beichhua chuan nimin khan Lengpuia Eri Seed Farm-ah Socio Economic Development Programme (SEDP) a tlangzarh. SEDP-ah AH&Vety department aṭangin pilot project atan ṭanpuina dawng tur mi 1,020 thlan a ni.

Dr K Beichhua chuan, hripui léngah ei leh bara Mizoram intodelh lohna a lang chiang hle tih sawin, "Intodelh tura hmalak chu CM Pu Zoramthanga kaihhruai sorkarin a ngai pawimawh hle a ni," a ti a; SEDP a hawn tâk chu mi ṭhenkhatin, 'SEDP in va sem har ve' an tih ṭhin chhanna a nih thu a sawi. Minister chuan, AH&Vety department-ah kum 2019-20 financial year chhungin SEDP cheng nuai 1,860 ruahman a nih thu a sawi a, "Kumin March thla aṭanga kalpui ṭan tum ni mah se, Covid-19 lockdown vanga kalpui theih a ni lo a, tunah kalpui ṭan theih a ni dawn ta a ni," a ti.

K Beichhua chuan, SEDP chu Sericulture department kaltlangin project based-in Mamit Aspirational district-ah kum 2019 khan ṭan a nih tawh thu sawiin, "March 2019 khan beneficiary 200 hnenah ṭanpuina pek ṭan tawh a ni," a ti a; a vaiin mi 500 hnenah kumin chhungin pangang khawi ṭanpuina pek tum a nih thu leh mi pakhatah Rs. 1,40,896 zel pek tum a nih thu a sawi. Fisheries department kaltlangin SEDP-ah cheng nuai 420.53 ruahman a nih thu sawiin, "Sangha khawitute hnenah subsidy-in sangha chi sem chhuah mek a ni a, pilot project atan cheng nuai 57 séngin chakai farm buatsaih mek a ni," a ti. MNF thuchhuah tarlan danin, AH&Vety department aṭanga SEDP ṭanpuina dawng tur mi 1,020 zingah vawkpui vulh mi 20 leh vawk vulh mi 200 hnenah Rs. 3,00,000 ṭheuh pek a ni dawn a; ar (broiler) vulh tur mi 400 leh rainbow rooster vul tur mi 400 hnenah Rs. 1,50,000 zel pek tum a ni bawk. SEDP tlangzarh inkhawm hi AH&Vety, Fishery & Sericulture Board vice chairman C Lalmuanpuia'n a kaihruai a, MLA Dr K Pachhunga'n a hmanpui a ni.