Union Minister-in Golf Course a hawng

5th August, 2020

Thenzawl Golf Course siam thar chu nimin khan Union minister of state for Tourism Prahlad Singh Patel-a'n video conferencing kaltlangin a hawng. Hawnna inkhawm hi Mizoramah chuan NIC conference hall-ah neih a ni a, Mizoram Tourism minister Robert Romawia Royte khualzahawm a ni.

Golf Course hawn inkhawm hi Tourism secretary Esther Lalruatkimi'n a kaihruai a; Prahlad Singh Patel chuan, Mizoram chu India rama hmun mawi ber páwl a nih thu a sawiin, "Biological hotspot leh khualzinte tana ram nuam a ni. Indian Foreign Policy zinga pawimawh em em Act East India Policy hlawhtlinna atan Mizoram hi state pawimawh a ni," a ti. Union Tourism Minister chuan, Covid-19 léng karah project fund táng leh khaihlak a awm loh tur thu sawiin, "Hna a hun tak leh ṭha taka thawh zawh a nih chuan ministry aṭangin funding-ah Mizoram sorkarin harsatna a nei lo ang," a ti a; Covid-19 léng a reh hun atan Mizoram sorkar chu tourism industry hmasawnna turin a inbuatsaih sauh sauh a ngaih thu a sawi.

Robert Romawia Royte chuan, Golf Course hawn a ni ta chu Mizoram leh Tourism department tan hlawhtlinna ropui tak a nih thu a sawi a, "India ram kilkhâwr taka awm Mizoramin hmarchhaka golf course ṭha ber kan nei a, a hmuna thil awm reng reng world class a ni. Golf course hmang hian Mizoram hi khawvel mithmuhah pho chhuah a nih ngei ka beisei," a ti. Robert Romawia chuan, Mizoram Tourism department-in project a thehluh la pawm lohte chu pawm a, project kal meka sum la pek chhuah kim lohte pawh pe chhuak vat turin Union Minister a ngen nghal bawk.

Union minister Prahlad Singh Patel-a aiawhin Robert Romawia Royte-in NIC conference hall-ah Thenzawl Golf Course hawnna ribbon a chep chat a; Lok Sabha MP C Lalrosanga leh MLA H Biakzauva te pawh an tel a ni. Golf Course (Resort) hi Swadesh Darshan hnuaia cheng nuai 6448.08 sênga siam a ni a, a siamtu Edufice Infraservices Pvt. Ltd., New Delhi chuan January 2016-ah thawk ṭanin, April 22, 2019-ah an zo. A chhungah hian eco log hut (in tê) 30, cafetaria, convention centre, gazebos pariat leh golf hole 18 a awm.