KHAWTHLIR

Minister of state TJ Lalnuntluanga chuan a bial Champhai South constituency chhunga Kelkang leh Dilkawn inkalpawhna kawng km. 1.7-a thui, a MLA fund hmanga laih zauh hna thawh mek a enfiah. Minister chuan, khaw kar kawng inkalpawhna ṭha a awm theihna tura khawtlang hruaitute leh ram neitute'n rilru zau tak púa hmalakna an ṭawiawm chu lawmthu a tih thu a sawi.

Sairang khuaa Covid-19 veiin a kài chhàwn palh theiha ngaih mi pasarih (mipa pali leh hmeichhia pathum)-te chu Thawhṭanni khan Rapid Antigen Test hmangin endik an ni a, hripui vei an awm lo.

Siaha district-ah state dang aṭanga lo haw tur leh lo haw tum an awm tawh rih lo avang­in Siaha DC Bhupesh Chaudhary chuan nimin khan an district-a sorkar quarantine facility 32 chu a khâr. Quarantine facility pali erawh chu hman chhunzawm theih tura tih a ni thung.

Rural Development mi­nister Lalruatkima chuan nimin khan Lawipui Local Council House a hawng. Lalruatkima ­chuan zirna, hriselna, ni­tin eibar zawnna kawng­ahte sorkarin hma a la nasa hle tih sawiin, "Hrileng karah hmasawnna hna chhunzawm zel a nite hi a ropui hle," a ti. Lawipui Local Council House hi cheng nuai 16 vel senga sak a ni.

State Referral Hospital-ah nimin khan Covid-19 vei mi pasarih leh vei rinhlelh thilah mi pali dah luh an ni. SRH-ah hian hripui vei mi 37 enkawl mek an ni a, ICU-ah pahnih, SICU-ah pathum leh Isolation Ward-ah mi 32 an awm. SRH-ZMC Bulletin tarlan danin, ICU-a awm pakhat chu ventilator nena enkawl a la ni a, pakhat zawkin hma a sawn. Isolation Ward-a awm zingah khawsik leh thawhah nasa vak lo nei pahnih an awm.