FMGEW-in an thil phûtte avanga lungawi lohna lantir an tum an ṭhulh

Federation of Mizoram Government Employees and Workers (FMGEW) chuan sor­kara an thil phût hrang hrang tihlawhtling tura Mizoram sorkar karna atana vawiin aṭanga lungawi lohna lantir an tum chu an ṭhulh rih.

FMGEW hian dearness allowance (DA) tihpun, hlawh a hun taka lâk leh sorkar hna­thawkte pension hun kum 62-ah tihsànte an phût a; chu'ng an thil phûtte tihlawhtling tura sorkar karna atan March 6-10 chhung lungawi lohna lantir (peaceful demonstration) an tum a ni.

FMGEW-in pawl hrang hrangte hnena lehkha an thawna an tarlan danin - March 4, Inrinni chawhma khan chief minister Zoramthanga hoin a pisaah sorkar hotute leh FMGEW hruaitute chuan FMGEW thil phûtte an sawiho a; deputy chief minister Tawnluia, Finance department hotute leh FMGEW hruaitute an tel.

Sorkar hotute chuan, FMGEW thil phûtte chu a theih anga an ngaihtuah avangin FMGEW-in March 6 aṭanga lungawi lohna lantir an tum chu ṭhulh turin an ngen a ni.

FMGEW Executive Commi­ttee Emergent chu March 4 vêk khan ṭhukhawm nghalin, sorkar hotute aṭanga an thu dawn chu an sawiho a; a hun taka hlawh pe zel tura sorkar hotute'n theihtawpa ṭan an lakna chu lawmawm an ti a, pension kum chungchangah CM-in inrâwnkhawm a rawt chu an pawm a ni.

Chutih laiin, April 1, 2023 aṭanga DA 3%-a tihpun erawh chu an beisei a phak loh avang leh sorkar laipui rate an phâk lohna a tam tawh avangin CM hnenah thlen nawn leh an rél thung. March 4 vêk zanah FMGEW hruaitute chuan CM Zoramthanga an hmu leh a ni.

An inhmuh lehnaah hian Chief Minister chuan, 3%-a DA tihpun pawh sum lamah sorkar a harsat em avangin harsa chung chunga pek remtih a nih thu a sawi a; mahse, FMGEW lamin ngènngáwl taka an ngen avangin 1%-a tihpun belh lehin, DA chu 4%-a tihpun a, chumi ang chuan April 1, 2023 aṭanga pek remtih a ni ta a ni.

Chief Minister an hmuh zawhah FMGEW hruaitute chu ṭhukhawm leh nghalin, thutlukna an siam a; "Sum harsa tak chunga sorkarin hlawh a hun taka min pe tura theihtawp chhuaha ṭan lak zel a tum hi lawmawm kan ti a. DA pung 4% wef 1.4.2023 min phalsak pawh hi kan duhthusam ni lo mah se, sorkarin theihtawp a chhuah tak zet niin kan ngai a. July 2023-a sawiho leh hun atan beiseina sang tak nei chungin March 6-10 chhunga peaceful demonstration neih kan tum chu ṭhulh lailâwk phawt mai ni se kan ti," an ti.