2022 - KṬP member thi tam ber kum; Inthlanpui puala ṭawngṭai rual an rél

Kum 2022 chhung khan Kristian Ṭhalai Pawl (KṬP) member mi 643 an thi a, thi an tam ber kum a ni. KṬP member thi zinga mi 567 chu mipa an ni a, thi zawng zawng aṭangin 88.18% a tling. KṬP rorel hian kumina MLA inthlanpui awm tur pualin ram pum huapa ṭawngṭai rual an rél.

March 3-5, 2023 chhung khan Zemabawk Presbyterian Kohhran biak-inah KṬP Rorel Inkhawm vawi 10-na neih a ni a; rorel inkhawm report-a a lan danin, kum 2022 chhung khan KṬP member 643 an thi a, chu chu report hmuh mai theih chin, 2013-2023, kum 11 chhunga KṬP member thi an tam ber kum a ni. Kum 2022 hma lamah kum khat chhunga KṬP member thi zat mi 500 an la tling ngai lo.

Report hmuh theih chinah, kum 2022 hma lama KṬP member thi an tam ber kum chu 2018 kha niin, mi 471 an thi a; kum 2018-a thi zat (471) aiin kum 2022-a thi zat (643) mi 172-in an tam zawk a ni.

Kum 2022 chhunga KṬP member thi mi 643 zinga mi 567 chu mipa niin, 88.18% a tling a, mi 76 chu hmeichhia niin, thi zat aṭangin 11.82% chiah a ni.

Nikumah khan KṬP member 1,65,089 an awm a, mipa 1,01,742 leh hmeichhia 63,347 an ni. Kum 2022 chhunga KṬP member mipa thi mi 567 chu member mipa zat aṭangin 0.56% a ni a, hmeichhia thi zat 76 chu member hmeichhia zawng zawng aṭangin 0.12% a ni thung.

KṬP Rorel Inkhawmah hian Inrinni khan nilengin rorèl a ni a, Central KṬP leader Rev.Dr F Pachhunga'n a kaihruai a, palai 859 an tel. Kum 2023-24 budget atan Rs 84,70,000 an pawm.

Rorelah hian kumina Legislative Assembly inthlanpui pualin ram pum huapa ṭawngṭai rual an rêl a; ruihhlo ngaite chhanchhuahna lamah hmalak an rél bakah, ṭhalaite zingah kohhran pawn lam rawngbawlna lian chho zel enkawl leh kaihhruai kawngah hmalak an rêl. Kum 2024-25 KṬP kumpuan thupui atan 'Tih tak zeta Lalpa rawngbawl' tih an thlang a, kum 2025-a rorel inkhawm nghahna atan Chawnpui kohhran biak-in an thlang bawk.

KṬP-ah hian branch 898 a awm a, chu'ng zinga 854 chu Mizoram chhunga mi niin, 44 chu Mizoram pawna mi a ni. KṬP dinna pastor bial 217 a awm a, Mizoram chhunga mi 202 leh state pawn lama mi 15 a ni.