Dan loa thil tih leh a titute man
Central YMA, Mizoram Police, Excise & Narcotics leh MVI mite chuan March 4, Inrinni zan khan Hunthar Veng leh Selesihah lirthei veivâk an endiknaah dan loa thil ti mi eng emaw zat leh an thil kawlte an man.
Hmun pahniha duty-naah hian CYMA aṭangin Central Executive Committee member mi 44, CYMA Kumpuan Committee aṭangin mi 12, Hunthar Veng Branch YMA aṭangin mi 25, Selesih Branch YMA aṭangin mi 24, Police mi pariat, Excise & Narcotics department mi 23 leh MVI mi pathum an tel a ni.
Selesih leh Hunthar Venga endiknaah hian hnam dang, ILP nei loa rawn lut mi 14, lirthei document fel lo leh an neih chhan ang ni loa hman 23, kuhva hring ip 57 leh kuhva ro ip 13 man a ni a; sapzu (IMFL) ûm kua an man bawk.
Central YMA chuan, endik hna an thawhna turah an ngenna tihhlawhtlinsaktu - Aizawl SP, Excise Commissioner leh Transport department hotute chungah an lawm hle tih an tarlang a; Mizorama dan loa thil tihte endikna chu a ṭul angin Mizoram pum huapin kalpui tum mek a nih thu tarlangin, hma an lakna awm zel turah sorkar thuneitute ṭawiawmna an ngen nghal a ni.